SHILLONG:
U National President ka National People’s Party (NPP), u Conrad K Sangma, haka 30 tarik Jylliew u la ong ba ka jingmut jong ka Uniform Civil Code (UCC) ka long pyrshah ïa ka jinglong jong ka Ri India kaba long ka ri kaba bun jait bun kynja bad kaba riewspah ha ka riti dustur bad ka ktien ka thylliej.
“Ka ri India ka dei ka ri kaba ïar bad ka jinglong pher jong ngi ka dei ka bor bad ka jingithuh ïa ngi, ngim tip kaei ka ban jia lane kum kaei ka bill kan long hynrei khlem da ïohi shwa ïa ka kaei kaba don hapoh jong ka bill, kan shem jingeh ban batai bniah halor kane,” la ong u Conrad Sangma.
Ka sorkar u Narendra Modi ka thmu ban wanrah ïa ka bill halor ka jingpyntreikam ïa ka Uniform Civil Code ha ka dorbar ka ban sa long ha ka Parliament, la pyntip ki lad pathai khubor. Ka jingmut jong ka Uniform Civil Code ka kynthup ïa ka jingthaw bad jingpyntreikam ïa ki aiñ shimet ka ban hap pyndonkam salonsar da baroh ki paidbah ka ri India, khlem da peit ïa ka jingngeit niam, ka long kynthei ne shynrang bad kiwei kiwei. Ïa mynta, la pyntyllun ïa ki aiñ shimet katkum ka jingngeit ha ka imlang sahlang.
U Myntri rangbah ka jylla, u Conrad K Sangma u la ban shuh shuh ba kumba peit mynta, “Ngi dei ka jaitbynriew ba shim ïa ka jinghiar pateng na ka kmie bad kane ka dei ka jingkhlaiñ jong ka kolshor kaba ngi don kabym lah ban pynkylla ïa ngi.”
Kum ka seng saiñ pyrthei, ka NPP ka peit burom ïa ka jinglong kyrpang ka kolshor bad ka riti dustur jong baroh kawei ka thaiñ shatei lam mihngi bad kumta, “Ngi kwah ba ka ym ktah ïa kane bad kan sah kumba ju long. Ngi donkam ban peit kumno ka bill ka long ba lada ka mih kan sa long kumno,” la ong u Conrad Sangma.
