SHILLONG:
U myntri rangbah ka jylla u Conrad K Sangma ha ka 14 tarik Naitung u la pyntip ba yn hap pynsangeh shuwa ïa ka jingïakren pynbeit pud hapdeng ka sorkar Assam bad ka sorkar jylla namar ba ka dang don hapdeng ka jingphiah konstitwensi hapoh ka jylla Assam.
“Haka jingshisha mynta ka taïew ngi la ïa pynbeit bad u myntri rangbah ka jylla Assam u Himanta Biswa Sarma ban leit jurip ïa ka thaiñ Khanduli West Jaintia Hills hynrei namar ba ka dang don ka jingphiah ïaki konstitwensi hapoh katei ka jylla, la hap ban pynkynriah noh ïaka tarik ban ïakren pynbeit pud” la ong u Conrad.
U Conrad ula ong ruh ba na ka liang u myntri rangbah ka jylla ka Assam ula buh da ka jingkyrpad sha ka sorkar jylla ban pynbeit noh ïa ka tarik ba thymmai ban leit jurip ïa ki jaka haki thaiñ khappud hashuwa ban sdang noh ka jingïakren pynbeit pud.
“Hashuwa ban kut une u bnai ngin leit jurip ïaka thaiñ Khanduli hynrei watla katta ruh ki Chairman bad ki Committee ki leh ïaki jingdonkam haba ïadei bad ka jingsdang noh ïaka jingïakren pynbeit pud” ula ong.
