SHILLONG:
U President ka Federation of Khasi Jaiñtia and Garo people u Bah Dundee C Khongsit u la pynrem jur ïa ka Harijan Panchayat Committee, ïa ka jingleh bym salia bad bym suidñiew jong ki ïa ka jingbthah ka sorkar.
Haba ïakren bad ki nongthoh khubor u Bah Dundee u la ong, “Ngi tip ba kine ki la don naduh ki snem ba mynshuwa bad ki dei ban tip ba ki wan kum ki nongtrei ha ki por jong ki phareng. Tang ba ki wan kum ki nongtrei bad ba ki la sah da ki phew snem, kim lah pat ban shu kam ei.”
U la bynrap ruh da kaba ong ba ka seng FKJGP kam lah ban pdiang ïa kane. U Bah Dundee u la bynrap shuh shuh da kaba ong, “Kino kino ki nongtrei kiba trei ha ki tnad sorkar, ka sorkar ka ai ïa ki ka ïingsah (Quarter) ba kin shong. Kaba pynlyngoh ïa ngi ka dei ba kine ki pyneh bad ki kam trai pynban ïa ka jaka ruh, ngi tip ba ka jingai jaka, ka dei tang shipor namar ki trei ha ka tnad Municipal, phewse mynta ki kam trai syndon ïa ka jaka ruh, kane ka long beaiñ.”
Ka FKJGP ka ïohi ba ki nongtrei kiba trei bad ka Municipal ki kohnguh, hynrei dei kito kiba shong be-aiñ, ba ki sngewthuh ba kin duh ïa ka lad kamai kajih lada ki phet na kane ka jaka ba ki sa pyrshah.
U President ka FKJGP u la ong ka sorkar ka donkam ïa kane ka jaka ban pynitynnad ïa ka namar kane ka jaka kumba ka long mynta ka long kum ka slum.
“Kito kiba trei bad ka SMB ki dei ban bud ïa ki kyndon jong ka sorkar,” ong u President ka FKJGP. Ha kaba u la kyntu ïa ka sorkar ba ka dei ban leh da kaba tyngeh.
U la ong ruh ba ha ka jingsngew briew ka sorkar ka la kular ruh ban ai da kawei ka jaka, haba ki pynkynriah ïa ki.
Haba ïadei bad ka jingdawa jong ka HPC u Bah Dundee u la ong, “Ka jingdawa jong ki kam shong nongrim haei haei ruh, kumno ki nongtrei kin dawa ïa ka Sorkar kaba ai kam ai jam ïa ki.”
U la bynrap ruh da kaba ong, “Ka kamram jong ki ka long ban bud ryntih ïa kaei kaba ka sorkar ka kwah.”
Na ka liang u President ka FKJGP u la bynrap shuh shuh da kaba ong ba ka jingdawa jong ki, ka long be-aiñ, hynrei ka shong ha ka jingstad jong ka sorkar kumno kan leh ïa kata.
