SHILLONG:
Ka jingïakren bad ka jingïakam trai halor ka dawai sboh bad ki jingmyntoi na ka bynta u nongrep hato kin dei tang ki mat ban jop ilekshon ne ka dei ban pynim ïa ki nongrep.
Ki nongrep ha ryngkat ki dkhot jong ka Federation of Khasi Jaiñtia and Garo People Agriculture cell ha ka 17 tarik u Ïaiong ki la hiar sha MeCoFED ban leit peit bad ban ïa kynduh ïa ki nongpeit halor ka jingbymdon dawai.
Haba kren bad ki nongthoh khubor u Chairman ka Agriculture cell u Bah Brister Mawthoh u la pynpaw ïa ka jingsngewnguh ïa ka sorkar kaba la ai subsidy ïa ka dawai sboh bad kane ka la ai jingmyntoi ïa ki paidbah nongrep.
U la bynrap da kaba ong, “Ka sorkar kala pyllait da ka subsidy ha kine ki snem ba la dep, hynrei mynta ka jingdon kam jong u nongrep ïaka dawai sboh ka la dei namar kila sdang ban donkam ha ka thung ka tep, da wan wad dawai ym don shuh, kane ka pynlong ïa ki nongrep ban wan ujor sha ka seng.”
Ha ka jingïakynduh bad ki ophisar ban tip ki dawai aiu ki don, ki nongrep bad ki dkhot ka seng kila lap ba ka dawai kaba don dei tang ka dawai SSP bad ka Dawai shyieng, hynrei ka dawai uria bad ka dawai DAP kam don. Ka sorkar pat ka la dep kular ban leh kloi ïa kane na ka bynta ka jingmyntoi ki paidbah hynrei kam shym la leh kumta.
“Ka uria bad ka DAP ki dei ki dawai kiba ki nongrep ki donkam bha,” u la ong.
U la bynrap ruh da kaba ong, “Ngi la pyrshang ban ïakren bad ki ophisar halor kane hynrei ki ñiat sha ka sorkar ba lada ka sorkar kam leh eiei kim lah ban leh eiei”.
U la ïathuh ruh ba ki la ïakren bad pynpaw ba ki kwah ban ïa kynduh ïa ka myntri ka rep ka riang bad ha ka sngi ba kin ïakynduh, kin sa dawa ïa ka sorkar ba kan leh kloi, “Ngim kwah ba ka sorkar kan shu thok ïa ki nongrep kiba dei ka budlum ka ïoh ka kot jong ka jylla,” u la ong.
“Ha ki por ilekshon ngi la ïohi kumba long myn ha kane la don kiba khap ribon ruh na ka bynta ban pynpoi dawai da ka trok hynrei ha ka jingïakren kaba jur bha ha ka por ilekshon, hadien ka ilekshon pat ym don kiba kren wat tang u wei ruh dei tang ki seng bhalang kiba buddien ïa kane ka jingeh ki nongrep,” ong u Bah Mawthoh.
Na ka liang ki nongrep ki pynpaw ïa ka jingsngewsih ban lap ba ki dawai kiba ka sorkar kala kular ha shuwa ka ilekshon kim shym la urlong satia.
Shuh shuh kine ki nongrep ki la kyntu ïa ka sorkar ban shim khia lem halor kane ka jingeh kaba ki ia kynduh namar kum ki nongrep kim don da ki wei ki lad ban leh lait noh tang ha ka rep ka riang bad dei na kane ka kam ba ki lah ban pynbiang ïa ka jingdonkam jong ka ïing ka sem ka jong ki.
