SHILLONG:
Hato ka jingïakhih da ka ba shah thngan jong u President ka VPP, u Bah Ardent Miller Basaiawmoit, kan lah ban pynbor ïa ka sorkar ban ktah ïa ka mat Reservation Policy ka ba long ka mat kaba bun na ki nongmihkhmat ha ka jylla kim nud ban ktah la 50 snem tam mynta halor ka nongrim ba kane ka mat kan sa pynduhnong ïa ka jylla?
Lah ban kdew hangne ba u President ka Voice of People Party (VPP), u Bah Ardent Miller Basaiawmoit, u la rai ban pynlong ïa ka jingïakhih da ka ba shah thngan naduh ka 23 tarik u Jymmang khlem buhpor hakhmat Secretariat, hadien ba na ka liang ka sorkar ka la rai ban ïatai halor ka Roster System ym ka mat Reservation Policy ha ka jingïalang jong ka All Party Meeting ha ka 19 tarik u Jymmang.
U Bah Ardent ha ka jingkren jong u, ha ka 19 tarik Jymmang u la ïathuh ba kane ka rai ban pynlong ïa ka jingïakhih da ka ba shah thngan khlem buh por ka long ban pynurlong ïa ka jingdawa jong ki khlem da pyndik ne pynthud ïa ki paidbah.
Lada kdew hangne ba na ka liang ka VPP ka la buh ïa ka jingdawa sha ka sorkar ba ka dei ban pynsangeh mardor ïa ka jingthungkam ha ki tnad sorkar bapher bapher ha ka jylla, katba ym pat lah ban pynbeit ïa ka Reservation Policy.
Ha ka 19 tarik u Jymmang ka sorkar MDA ka la pynlong ïa ka jingïalang All Party Meeting, ban ïatai bad shim jingmut na ki nongmihkhmat na ki seng saiñpyrthei bapher bapher ha ka jylla halor ka jingpyntreikam ïa ka roster system ha ka jylla.
Lada pynkynmaw, ki MLA ka VPP, ki la pyrshang ban rah ïa kane ka mat ban ïatai hapoh ka ïingdorbar mang tyngka, kaba dang shu dep shen ha u bnai Lber, hynrei na ka liang ka Sorkar ka la kyntait ban ïatai ïa kane ka mat hapoh ka ïingdorbar, kumta ki nongïalam ka VPP ki la rai ban mih noh sha surok ban leit ban pynsngewthuh paidbah halor ka jingdonkam ban pynbeit biang ïa ka Reservation Policy namar ka la ktah jur ïa ki samla Khasi Jaiñtia.
Ka VPP halor kane, ka la rah kylleng kylleng ban pynsngewthuh paidbah ha ki jingïalang ba kum ka party ka la ju pynlong bad ha ka 12 tarik u Jymmang ka la pynlong ïa ka jingïalum lang ha parkinglot ka Additional Secretariat ban leit ai da ka shithi sha u Myntri Rangbah ka jylla ban dawa na ka sorkar ba hapoh ka 48 kynta dei ban pynsangeh mardor ïa ka jingthungkam ha ka jylla katba ym pat lah ban pynbeit ïa ka Reservation Policy.
Ha ka 16 tarik, hadien ba la kut ka jingaipor sha ka sorkar MDA-II, ka VPP ka la sdang ïa ka jingïakhih jong ka, da ka ba shong kyllaiñ mongor ha parkinglot Additional Secretariat ban pynurlong ïa kane ka jingdawa hadien ba na ka liang ka sorkar kam shem la jubab eiei ïa ka shithi ba la phah da ki nongïalam ka VPP.
Kumjuh ha ka 19 tarik Jymmang ki nongïalam ka VPP ki la khot ïa baroh ki paidbah ban ïa lum lang ha parkinglot ka Additional Secreatriat ban sngap ïa ka rai kaba kum ka sorkar kan shim ha kaba ïadei bad ka jingdawa ban pynsangeh mardor ïa ka jingthungkam katba ym pat lah ban pynbeit ïa ka reservation policy.
Lada phai sha ka rai ba la shim ha ka jingïalang jong ka All Party Meeting, ki nongmihkhmat jong ki saiñpyrthei bapher bapher ki la hun ïa ka rai ban thaw da ka “Committee on Roster System” ka ban khlieh da ka Myntri ka koit ka khiah ka jylla ka Kong Ampareen Lyngdoh, kane ka committee ka long na ka bynta ban bishar halor ka jingtreikam ka roster ha ka jylla ban kham pynbha bad ban bishar bniah da ka ba shim ïa ka jingai jingmut jong baroh ki dkhot ha ka committee ki ba kynthup ïa ki nongmihkhmat na ki seng saiñpyrthei bapher bapher.
Ha ka All Party Meeting la shim ruh ïa ka rai ban ym pyntreikam shuh ïa ka roster system sha ki snem ba la dep hynrei yn pyntreikam sha khmat naduh ba la ïoh ka jingbthah na ka ïingbishar bad rai ruh ban pynsangeh noh mardor ïa ka jingthungkam katba ka committee kam pat ai ka kaiphot jong ka halor ka jingshong bishar ïa ka roster.
Lada phai sha ki nongïalam na Rilum Garo, ki mynjur ban pyntreikam ïa ka roster system shakhmat ym shadien hynrei kim sngewïahap ïa ka jingdawa ban pynbeit shwa ïa ka reservation policy.
