SHILLONG:
Ka jingpyrshang ban pynpaw ïa ki ba donkti ha lyndet jong ka jingtwa khyndew ha Rngaiñ, kaba la shim noh ïa ka jingim jong ar ngut ki rangbah ha ka 14 tarik Ïaïong, ka sah ha ka umdum bad ha ka jingkulmar jingmut namar ka i kumba ka don ka jingïaleh ban pyntynrong ïa ka jingbah khlieh ha ka kompeni ARSS Infrastructure Projects Ltd, kaba pyntrei ïa kane ka bynta jong ka surok bah National Highway 40 kaba ïaid lyngba kane ka jaka.
Katto katne sngi hadien kane ka jingjia, ka ARSS Infrastructure Projects Ltd ka la pynpaw ïa ka jingkloi ban weng noh ïalade na ka projek surok Shillong – Dawki kaba T 210 klur hapoh ka Package II, katba ka tyllong khubor ka la ong ba ka kompeni ka la shah pynbor ban ieh noh ïa kane ka projek, ka sienjam kaba bun ki shim ba ka dei tang ka buit jong ka sorkar ban tap eit miaw.
Ka tyllong khubor na ka National Highways & Infrastructure Development Corporation Ltd. (NHIDCL) ka la ïathuh ba ka sorkar jylla kala bthah ban pynkut noh ïa ka jingïateh kontrak ryngkat bad ka ARSS, hadien ka jingjia ha Rngaiñ.
Ka ARSS Infrastructure Projects Ltd ka la ïoh ban pyntrei ïa ka Package II jong ka projek surok Shillong-Dawki ha ka mang tyngka kaba T 210 klur. Kane ka package ka kynthup ïa ka jingpynbha lane ban pynïar ïa ka surok ban pynlong ar lane ha ka jingjngai kaba 26-km, kaba kynthup ruh ïa ka bynta ba la shah ktah dang shen na ka jingtwa u lum ter ter shaduh Pynursla.
Katkum ka tyllong khubor na ka NHIDCL, ka sorkar kam sngewhun ïa ka jingtrei ba la pynïaid da ka ARSS bad ka sorkar ka la bthah ïa NHIDCL ban pynsangeh noh ïa ka jingïasoi kontrak hadien ka jingjia ha ka 14 tarik Ïaïong.
Haba kylli la ka sorkar jylla ka don ïa ka bor ban dawa pynsangeh noh ïa ka kontrak wat hadien ba la aiti ïa ka projek sha ka NHIDCL, ka tyllong ka la ong ba ka sorkar ka kwah ïa kane namar ka jingbym lah ka ARSS ban pyndep ïa baroh ki kyndon kiba la buh.
“Ka NHIDCL ka la aiti ïa ka projek sha ka ARSS ha u snem ba la dep hynrei hapdeng ka jingpyntrei ïa ka kam, ka kompeni kam shym la lah ban pyndep ïa ki kam ryngkat ki kyndon bad ka la don ruh kiwei pat ki daw,” la pyntip ka tyllong khubor.
Ka tyllong ka ong ba kam shym la kwah ban batai bniah halor kita ki kyndon bad ki daw aïu kiba ka ARSS kam shym la lah ban bud.
Uwei u nongtrei sorkar ba la kham rangbah, u bym shym la kwah ban pynpaw kyrteng ha ka 18 tarik Ïaïong u la ong ba ka ARSS ka lah ban weng noh na kane ka projek, hynrei u la pynpaw ba ka daw ka long kabym thikna. Une u nongtrei u la ïathuh ba ka NHIDCL ka la phah da ka shithi sha ka ARSS ha kaba ki la kylli la ka ARSS ka dang kwah ne em ban bteng ïa ka kam, ha kaba ka jubab kaba la ïoh ka long “Em”.
Haba ïadei bad ka jingkylli la ka ARSS ka la shah pynbor ban weng hi noh na kane ka projek hadien ka jingshah kynnoh, ka la paw pyrthei ba ka kompeni ka ai kongtrak shuh shuh ïa ka kam sha ki kawei ka seng bhalang, hynrei u nongtrei sorkar u la ong ba ym don jingtip ei ei halor kane ka bynta.
Ka la don ka jingkynnoh ba ka ARSS ka la don ka jingïasngewthuh jingmut bad kawei ka seng bhalang lane ka trei hapdeng ka jingshah byrngem namar ka jingtuklar ba man ka por, namar la ïoh jingtip ba ka jingpyntrei ïa kane ka kam ka long ba la ai pateng ïa ka kotrak sha kawei ka seng bhalang kibym shym la shah pyntbit, bad kane ka la buh ïa ka jingim ki paidbah nongleit nongwan ki ba ïaid lyngba kane ka surok ban poi sha Pynursla ha tmier ka jingma.
Ka jingkylli ba mih mynta ka long, Hato ka ARSS ka dei tang maka kaban hap shim ka jingkitkhlieh halor kane ka jingjia? Hato ka NHIDCL, ka PWD (NH) ka jylla, ka tnad Forest, ka tnad Mining bad Geology ki pyrshang ban thet kti halor kane ka jingjia?
