SHILLONG:
U MDC shu sieh, na ka party United Democratic Party (UDP) u Bah Bindo Lanong, ha ka 26 tarik Jylliew hapoh ka dorbar lyïur, u la wanrah ïa ka Motion ban ïatai halor ka jinglong jingman jong ka shongsuk shnongsaiñ hapoh ka Khasi Hills District, ka ba la wan hadien ba don ka jingïakajia ha ka jylla Manipur.
“Nga wanrah ïa kane ka Motion, namar ba ka la mih ka jingeh wat ha ka jylla Meghalaya ruh na ka daw ba mih ka jingïakulmar ha ka jylla Manipur. Bun na ki nongshong shnong na ka jylla Manipur ki la wan phetrieh sha kiwei pat ki jylla kynthup ruh ha ka jylla,” u la ong.
U la kdew ba na ka liang ki dorbar shnong ha ka jylla ki shem ïa ka jingeh ban tehlakam ïa kane ka jinglong jingman na ka daw ba ki pyni ba ki wan ban sah lang bad ki bahaïing ha kane ka jylla. “Ngi don ka jingsngewkhia, kaei ka ban jia lada ki sah noh shirta hangne?”, u la buh jingkylli.
Ka jingjia ha ka jylla Manipur ka la don ka jingshah ktah, bad kyntu ruh ïa ka Executive Committee, ba ki dei ban ai ka jingbthah sha baroh ki dorbar shnong ban long ki ba peitngor bad ki dorbar shnong lada ki lap ïa kum kine ki mat ki dei ban shimkhia ban pyntip ïa ka sorkar Jylla lane ki bor ka District Council.
Haba shim bynta ban ïatai halor kane ka Motion, na ka liang u nongïalam ka liang pyrshah hapoh ka ïingdorbar ka Council u Bah Titostarwell Chyne u la ong ba kan dei ka jingkitkhlieh jong ka KHADC ba kan shim khia ban peitngor halor kane ka mat.
U Bah Titos u la kdew ruh ba ka EC ka ba la ïalam da u, ka la dep ban pynlong ïa ka jingïalang bad ki khlieh nongsynshar, bad bthah ruh ïa ki, ba ki dei ban long ki ba peitngor, hynrei u la kam ruh ba don na ki khlieh nongsynshar ki ba la kam ba ka don ka jingshah byrngem na ki katto katne ki kynhun ki ba don ha ka bor, halor ka jingbym shah ban sah ïa kine ki briew.
“Ngi pynpaw ïa ka jingsngewsynei ïa ki nongshong shnong ka Manipur halor ki jingmih ka jingkulmar ha kane ka jylla, hynrei na ka liang ka Sorkar Jylla ka dei ban shim jingtip katno ngut ki nongshong shnong na ka jylla Manipur ki la wan ban phetrieh sha kane ka jylla”, u la ong.
Haba pynpaw ïa ka jingsngewkhia halor ka jingwan sah ki nongshong shnong na ka jylla Manipur sha ka jylla Meghalaya, u Bah Titos, u la buh ïa ka jingkylli ïa ka sorkar jylla, hato ka kwah ban ïohi ïa ka jingmih jong ka “refugee colony” ha ka jylla, da ka ba kdew ïa ka Refugee Colony, ka ba ladon lupa ha ka jylla.
Na ka liang u MDC ka UDP u Jambor War , haba ïashim bynta lang ha ka ne ka motion u la ong, ka jylla ka la donkam kyrkieh ïa ka jingpyntreikam ïa ka Inner Line Permit (ILP) ban ïada ïa ka jylla na ka jingwanrung kyrthep ki poiwir ki bym dei na ka jaitbynriew Khasi.
Na ka liang u MDC shimet, u Bah Latiplang Kharkongor, u la kam ba ka jingwan phet jong ki nongshong shnong ka Manipur sha ka jylla ka ju jia ha ka por shiteng miet kaba pynlong ïa ki dorbar shnong ban long ki ba tlodbor. U la kam shuh shuh ba kine ki briew ki la ïoh ruh ban thied ïa ki jaka puta ha ka thaiñ Ri Bhoi ha Pilangkata (Ri Bhoi) bad sha ki jaka khappud.
“Lada, ym don kano kano ka jingpeitngor, kan ym slem ba ïa ka jylla Meghalaya ruh yn sa leh don bor da ki jaitbynriew Manipur,” u la kam.
Haba jubab halor kane ka Motion u Symbud Chief Executive Member (Symbud CEM) u ba long ruh u EM -in charge ka tnad Elaka u Bah Pynshngainlang N. Syiem u la ong ba ka dei ka kamram jong ka sorkar jylla ban phaikhmat halor kane ka mat.
“Ka jylla ka donkam ïa ka jingpyntreikam ïa ka ILP ban ïada na ki nongwansah beaiñ ha ka jylla bad donkam ruh ban bishar biang ïa ki aiñ jong ka Council”, u la bynrap.
