NONGSTOIÑ:
Hadien ka jingpyrshah jur ki paidbah ka thaiñ Rambrai ïa ka jingksam marpoh khyndew ha ka shnong Mawlangria ki bor pynïaid District ka WKHD ha ka 10 tari Jymmang kila hiar sha katei ka shnong ban pynlong ka jingjurip ïa katei ka jingtih marpoh khyndew.
Na ka liang jong ki paidbah nongshong shnong jong katei ka shnong bad ki shnong ba marjan kila pynpaw ïa ka jingpyrshah kaba jur ïa katei ka jingksam marpoh khyndew ha katei ka jaka da kaba kila kynnoh ruh ba kala pynjakhlia ïa ki tyllong umbam umdih.
Shuh shuh ki paidbah nongshnong shnong kila dawa ruh na ki bor pynïaid District ba kidei ban phah sangeh noh ïa katei ka jingtrei bad kila pynpaw ruh ba kim kwah shuh ban ai lad ba katei ka jingpyntrei ïa katei ka kam kan dang ïaid shakhmat.
Ïa katei ka jingksam marpoh khyndew ha katei ka shnong la pyntrei da u bah Macdonald Lyngdoh u ba dei ruh u trai khyndew bad katkum ka jingïathuh jong u la ong ba ka jingksam ïa katei ka jaka ka long ban wad bniah ban lap ïa ka jingdon u marpoh khyndew iron ore ha katei ka jaka.
U Bah Macdonald Lyngdoh u la kam ruh ba katei ka jingtih marpoh khyndew ha katei ka jaka kam shymla don staia ka jingpynjaboh ïa ki tyllong um kumba la kynnnoh da ki nongshong shnong bad u la kular ruh ba un shim ïa ka um ban phah test khnang ban lap ïa ka jingshisha.
Na ka liang jong ki bor pynïaid District kila bthah ïa ki nongpyntrei ba kin pynsangeh shwa ïa ka jingpyntrei tad haduh ba kin da lah ban pynbiang shwa ïa ki lad jingïada ban pyntikna ba kan nym don kano kano ka jingktah ïa ki tyllong um bam um dih jong ki paidbah nongshnong ha katei ka thaiñ.
