SHILLONG:
Ka Confederation of Ri Bhoi People (CoRP), ha ka 27 tarik Jymmang ka la leit ban ai jingkyrshan ïa u President ka Voice of the People Party (VPP) u Bah Ardent M Basaiawmoit uba pynlong ka jingshah thngan kaba khlem buh por, ban dawa ba ka sorkar kan peit biang ïa ka reservation policy ha ka jylla.
Haba kren sha ki lad pathai khubor, u President ka seng u Bah Bandari Ryntathiang, u la ong ba ka mat kaba ki kyrshan ka long kaba donkam eh na ka bynta ka Ri bad ka jaitbynriew bad na ka bynta ki samla kiba dei ka lawei jong ka jaitbynriew. U la ong ruh ba ka khubor ba ka seng ka phah sha ka sorkar ka long ba ka sorkar ka dei ban shimkhia noh mardor ïa kane ka kam kaba ka VPP ka dawa bad ka jaitbynriew ruh ka dawa.
U la ong ruh ba u phah ka khubor kaba shai sha ki MLA Khasi kiba shong ha ka bos jong ka NPP ba kin sngewbha ban hiar noh na ka bos bad u la ong ruh ba ki jingeh kiba ka jaitbynriew kan sa nang mad ha ki snem ban wan ka dang shyrkhei shuh shuh.
Ha kawei pat ka liang, u Vice President ka seng u Bah Pateng Myrsing u la ong ba lada ka sorkar kan ïai bteng ban sngap mynthi, ka jingïakhih kan sa pluh. U la ong ruh ba na ka liang jong ki kum ki khun samla, kim lah shuh ban set bad kim lah shuh ban kun ïa ka jingleh kuman ka sorkar bad dei na kata ka daw ba ki wan ha kane ka sngi ban dawa ba ka sorkar kan pynbeit noh ïa ka reservation policy.
