SHILLONG:
Ka Khasi Students’ Union Laban Circle mynne ka sngi ka 13 tarik u Jymmang, 2023 ka la leit jurip ïa ki dukan bam dukan dihsha kiba don ha Laban, Lumparing, Lumshatsngi bad K.O.R. halor ka jingkhuid jingsuba jong kine ki dukan bam hadien ba ka seng kala ïoh jingujor barabor na ki paidbah ba kine ki dukan ki long kiba torti haduh katta katta bad bun ngut ki ju ïoh pang man ka por lada bam na kine ki dukan.
Ha ka jingjurip jong ka seng ïa ki 27 tylli ki dukan bam, la lap ba bun na kine ki dukan kim shym don ïa ka license na ka FSSAI kaba shah ïa ki ban plie bad die ïa ki jingbam bad don katto katne na kine ki dukan ba la lap ba ka jingjaboh ka long ba i saitmet haduh katta katta ba ka seng ka hap ban khang khyrdep shwa ïa kine ki dukan kat ba kim pat lah ban pynkhuid kat kum ki kyndon ba la buh da ka FSSAI. Kine ki long ka Appayani Tea Stall ha Laban, Babua Tea Stall ha Lumshatsngi, Dada stall ha Red Cross bad Ruma Das Tea Stall ha Laststop.
Ka Seng ha kine ki sngi kan phah ruh ïa ka report jong ka jingshem jong ka ha kaba ïadei bad kane ka jingjurip sha u Food Inspector, FSSAI bad u myntri ba dei peit.
Ka Seng ka kyntu ruh sha baroh ki dukan bam ba kin long kiba leh khuid bad ki tiar bam khang ba ka nym ktah ïa ka koit ka khiah jong ki paidbah.
