NONGSTOIÑ:
U MLA ka Nongstoiñ Constituency u Bah Macmillan Byrsat u la pynpaw ba ki kynhun Balang ha kine ki sngi ki la ïakynduh jingeh ha kaba ïadei bad ka kam thep bad sei pisa ha ki Bank bad bun ki Balang kim lah shuh ban sei ïa ka pisa ba kila kynshew ha ki Bank namar ki hap bandon ïa ki Pan Card na ka bynta ïoh sei ïa ka pisa.
U la ong ba ïa ki Balang la pynïahap bad ki Sport Club ne ki NGOs, namar an ïoh Pan Card ki hap ban rejister shwa ha DC ophis bad lada long ha kane ka dur ki Balang kim long shuh kiba laitluid bad lada jia ba ki Balang ki buh pisa palat ban ïa kaei kaba ka tnad Income Tax ka la buh, ki lah ban shah ai notice ruh ha katei ka tnad bad kane kan buh jingeh ïa ki Balang.
U la pynpaw ruh ba ha kaba ïadei bad kane ka bynta, na ka liang jong u, u la depban kren ruh ïa u Myntri Rangbah ka jylla u Conrad K. Sangma ba dei ban wad ki lad ki lynti na ka bynta ban weng noh ïa kane ka jingeh kaba ki Balang ki ïakynduh.
U MLA ka Nongstoin u la pynpaw ruh ba kiwei kiwei ki Balang kum ki Muslim bad ki Hindu ki lait na kane ka jingshah tehlakam ha ka aiñ namar ki la don ïa la ka jong ka Personal Law kaba ai jingiada kyrpang ia ki hynrei ki Balang Khristan pat kim don ïakiba kum kita ki aiñ lait noh tang ka Christian Marriage Act.
Ïa kane u MLA Bah Macmillan Byrsat u la pynpaw haba kren kum u kongsan ha ka sngi pynhap pyrda ïa ka 1st Bising Football Tournament ba la pynlong ka NPYF Mawkhlam-Nongpyndeng ha madan Don Bosco Mawkhlam ha kaba ka Dong Nongrim- A SC ka la ioh ban khur ïa ka jingjop da 2 kol la 0 pyrshah ia ka Mawtynrong SC.
