SHILLONG:
Sa shisien pat ki pulit ka East Jaiñtia Hills District ha ka step jong ka 16 tarik Lber, ha ka por kumba 4 baje ki la ïoh ka jingtip ba kawei ka nongshalan drok kaba kyrteng ka Lathazuali Ralte ka la phah da ka Lalduhwami Ralte ban rah ïa kine ki jingdih beaiñ na Mizoram sha Shillong lyngba kawei ka kali kamai, ka Tata Sumo kaba don ïa u No. ML 05 K 2432.
Dei ha ka por 5baje mynstep ba ki pulit ki la ïohbat noh ïa kane ka kali ba la batai haneng ha Ladrymbai hajan ka Friend Hotel. Hadien ba lahdep leh ïa baroh ki jingdonkam ha ka jingdonlang ki sakhi katkum ka NDPS Act, ki pulit ki la pynlong da ka jingkhynra ïa kane ka kali bad ki la ïoh kawei ka pla kieng. Hadien ba ki la plie ïa kane ka pla ki la lap ba don ka song plastik kaba don san tylli ki synduk sabon ba don u powder rong stem.
Wut wut ki pulit ki la pynlong da ka jingleh test ïa une u powder bad ki la lap ba u dei u drok Heroin uba khia haduh 55.68 gram.
Shuh shuh, ha kaba ïadei bad kane ki pulit hapdeng ka jingtohkit bad ka jingïalam lynti ka Lalduhwami Ralte ryngkat ka kynhun ki pulit ka East Jaiñtia Hills ki la leit sha Shillong ban leit kem ïa ka Lathazuali Ralte kaba dei ka khlieh halor kine kiei kiei baroh bad kaba ju shim ïa kine ki drok ba la wanrah na Mizoram.
Ryngkat lang ka jingïarap jong ki pulit ka Madanriting Police Station, ki pulit ki la leit ban kem ïa ka Lathazuali na ka ïing sah jong ka ha Demthring, Madanriting bad la wanrah noh ïa ka sha Ladrymbai ha kaba ïadei bad kane ka jingïohkem drok. Ha kaba ïadei bad kane ki pulit ka Khliehriat Police Station ki la register ïa ka case no. 22 (3) 2023 U/s 21(b)/29 NDPS Act bad ki dang pynlong shuh shuh ka jingtohkit.
Kine ki ar ngut kiba shah kem ki long ka Lathazuali Ralte, 45 snem ka rta bad ka Lalduhawmi Ralte, 42 snem ka rta bad nalor u drok ba 55.68 gram, ki pulit ki la kurup ruh ïa ar tylli ki mobile phone.
Ha kawei pat ka jingjia, hynnin ka sngi ka 15 tarik u Lber, ha ka por kumba 3:35 janmiet, ki pulit jong ka Umkiang PP ki la pynlong da ka jingpynap shrip ha Damcherra, Kuliang, NH-6 bad ïohbat ïa kawei ka Honda City B/R No. AS-06-V-8941 bad ha kane ka jingkhynra ki pulit ki la ïohbat ïa u kynja ba la song bha da ka brown tape ba la thep bha hapoh ka kali bad une u kynja u khia haduh 84 kg.
Ha kaba ïadei bad kane ka jingjia ki pulit ki la kem noh ïa u nongniah jong ka kali uba kyrteng u Laxmindar Gour bad nalor kitei ki kynja ki pulit ki la kurup noh ruh ïa kawei ka mobile phone bad katei ka kali ba pyndonkam ban kit ïa une u jingdih pynbuaid bad ki pulit ki la register case ha Lumshnong PS Case No. 12(3) 2023 u/s 20(b) (ii) (c)/29 NDPS Act.
Shuh shuh hynnin ka sngi sngi, ha ka por kumba 6:45 janmiet ki pulit ka Umkiang ha kane kajuh hi ka jaka pynap shrip jong ki, ki la ïoh ban bat ïa kawei ka Mahindra KUV 100 B/R No. AS-12-P-2301 bad na kane ka kali ruh ki pulit ki la ïohkem ïa ki kynja ba la song bha da ka brown tape kiba khia haduh 77 kilo.
Ha kaba ïadei bad kane pat ki pulit ki la kem noh ïa u Md. Hachan Mia (37) bad u Mid. AjirHosen (35) bad nalor kitei ki kynja ki pulit ki la kurup ruh ïa ar tylli ki mobile phone bad ka kali ba pyndonkam ha kaba kit ïa kine ki jingdih.
Halor kane pat, ki pulit ki la register case ha Lumshnong PS Case No. 13(3) 2023 u/s 20(b) (ii) (c)/29 NDPS Act.
