SHILLONG:
U Myntri Rangbah ka jylla u Conrad K Sangma, ha ka 1 tarik Jymmang, u la pyntip ba ka jingpynïaid shakhmat ban wanrah ïa ka rukom tih dewïong kat kum ka jingstad saïan, kan lah ban urlong noh hapoh ka 60 sngi, namar ba ka jingpynbit pynbiang ïa ki kot ki sla ka la jan poi sha ka bynta ba khadduh.
Ïa ka ne u national president ka National People’s Party, u la ong ha ka jingïalap election na ka bynta u kyrtong ka Sohïong Konstitwensi, “Hapoh ka 60 sngi naduh mynta ka sngi ka jingtih dewïong katkum ka juk stad saïan mynta kan sa urlong noh ha ka jylla, Meghalaya”.
U la bynrap “Une u long u mawmer u ba heh, u ban lah ban pynkylla ïa ka rukom im jong ki nongshong shnong ha kine ki thaiñ bad kumjuh sha kiwei pat ki thaiñ ha ka jylla”.
U la kdew ba ka Supreme Court ka la bthah ïa ka sorkar ha ka jylla Meghalaya bad ha kiwei ki bynta jong ka Ri India ba dei ban pyntrei ha ka rukom trei ka ba pher bad ailad ban pyntrei da katkum ka jingstad saïan mynta.
“Nga kwah ban pyntip sha phi ba kata ka sngi ka la jan wan mynta. Ka Sorkar Pdeng ka la pynlait ïa ka mining lease na ka bynta ki 4 ngut ki trai par. Ka Sorkar Pdeng bad ka Sorkar Jylla mynta ka dang don ha ka lynti ka ba khadduh noh sa ban urlong noh shen” u la bynrap.
Lah ban kdew hangne ba na ka liang ka National Green Tribunal (NGT) ka la khang ïa ka jingtih dewïong kum ki thliewkhnai naduh u Ïaïong 2014. Ka Supreme Court ha u snem 2019 ka la rah ïa kane ka jingkhang da ka ba ai hukum ba dei ban tih dewïong katkum ka juk mynta.
