SHILLONG:
Ka KSU Khliehriat Town Unit bad ka Ladrymbai Unit myn haka 8 tarik u bnai Nohprah ki la leit ïa kynduh bad u Additional SP ka East Jaintia Hills u Bah Banraplang Jyrwa uba dei ruh uba khmih ïa ka tnat pynïaid kali (Traffic) halor ka jingjur palat ka jingdheng kali ha ïew Ladrymbai bad ïew Khliehriat naduh ka por Mynstep, mynsngi haduh jan miet kaba la jan man ka sngi.
Kum ban shu pynkynmaw ba na ka liang ka KSU EJHDU ha kine ki khyndiat bnai ba la dep ka la dep ban ai da ka dorkhas bad pynsngew sha u Myntri ka tnat kam poh ïing u Bah Prestone Tynsong ban wanrah da ka Traffic Branch hapoh District khnang ban lah ban teh lakam bha ïa ka rukom pynïaid kali ha district, hynrei sngewsih ba haduh mynta ka sorkar ka khlem leh eiei halor kane ka jingdawa ka seng. Halor kane haba ïakren bad Additional Deputy Superintendent of Police u lah pynsngew ba ïa kane ka mat na ka liang ka jong ki, ki lah ju dawa ruh ïa kane.
Na ka liang ka seng lyngba u samla nongïalam u Chanky Shylla u General Secretary Ladrymbai unit bad u Samla Kyrshan Dkhar uba dei u President Khliehriat Town Unit ki la ai jingmut ïa ka tnad Traffic Cell ban teh lakam ïa ka jingjur palat ka dheng kali ha ka District Headquarter bad ïew Ladrymbai da kaba pynmih ïa ka Advisory Lane Order ka ban pynïaid noh ïa ki trok thylli na ka Bypass Ladrymbai PWD khnang lait na ka dheng kali ba ha ka por mynsngi ha Ladrymbai bad Khliehriat kaba ktah shisha ïa ka ïaid ka ïeng ki paidbah bad ïa ki khynnah skul bad khamtam ïa ki kali Fire Brigade bad Ambulance ba kit nongbah na kawei ka jaka sha kawei pat kaba lah ban wanrah ïa ka jingjia ba sngewsih lada sah kut ha ka dheng kali. Ïa kane ka seng ka la ai jingmut ban leh shwa kum ka jingpyrshang bad ban peit kumno ka seisoh ne em.
Ka seng ka ïai ban ba ka Traffic Branch ka dei ban don noh ha District khnang ba ki paidbah ka thaiñ kin nym shah ktah.
