SHILLONG:
Ka sngi ba ar jong ka jingïaid lynti jong ka Chief Minister’s Start-Up bad ka Corporate Social Responsibility (CSR) kaba long ha State Convention Centre Shillong ka la ïaid beit ïaid ryntih, ha kaba bun ki prokram kila don kum ka jingai jinghikai haba ïadei bad ki aiñ jong ka CSR, ka Entrepreneurship and Sustainability Conference, ki jingïatai bad ki wei ki prokram kiba ai mynsiem ïa ki ba seng kam lajong ha ka jingïaid lynti jong ki.
Ïa kane la pynlong da ka Promotion and Incubation of Market Driven Enterprises (PRIME) ha ka jingïatreilang bad ka Invest India and Start Up India, kane ka jingai jinghikai ka long ban ïarap ïa kiba thrang ban seng kam lajong , ki khynnah pule, ki nongïalam, ki ophisar sorkar, ki seng treimon sngewbha, ki ba don bynta ha ka pule puthi ban pyn sngewthuh ïa ki aiñ, ki kyndon, ki policy bad ka mang pisa na ka bynta kito ki ba dang sdang na ka sorkar jylla , lyngba ka PRIME kan ïarap ïa kito kiba dang sdang ban seng kam seng jam ha ka jylla.
Haba pdiang sngewbha ïa kiba wan ïa shim bynta, ka Aprajita Saini kaba dei ka Manager, jong ka Startup India, kala ai khublei kyrpang ïa ka PRIME Meghalaya bad ïa ka sorkar jylla na ka bynta baroh ki jingkyrshan haba ïadei bad ka jingpynlong ïa kane ka prokram kaba sei soh.
Haba kren ha kane ka sngi ka Saini kala ong ba kane ka sien jam ka long ban ai mynsiem ïa ki nong sengkam bad ban pyndap ïa ka jaka ba thylli bad ban pynlong, ïa ka long ka man kum ka wei na kiban khriang ha ka ri baroh ka wei.
Na ka liang u Flo Oberhofer, Program Head, jong ka PRIME, haba kren ha kane ka sngi u la pynpaw da kaba ong ngi dei ban tip ha baroh ki bynta, khamtam haba ïadei bad ka kolshor kaba don bynta lang bad ka seng kam seng jam la ka dei na ka jylla Meghalaya, na North East bad na kylleng ka ri India.
“Ngi don bun jait kiba seng kam seng jam ha ki bun bynta , kiba kynthup naduh ka trai jong ka jingsdang. Nga tharai kane ka dei kaei kaei kaba ngi hap ban peit sha khmat ban tip bad ha ka juh ka rukom ban pyntip lang ïa kiei kiei kiba ngi don sha ki wei , khamtam haba ïadei bad ka seng kam seng jam,” u la ong.
Ha kane ka sngi la ïoh ïa ka jingkren na u Neeraj Kumar Khater u ba dei u Assistant Manager, ka Startup India Team, u Pankaj Periwal, FCA, u Nikhil Pant, CEO, REACHA & Founder, Lakshyaa Former Chief Programme Executive, NFCSR, IICA, Ministry of Corporate Affairs, Govt of India bad na ki wei ki wei de.
Na ka liang u Dr B.D.R Tiwari, IAS, Commissioner and Secretary, jong ka sorkar jylla u la ong ka nongbah Shillong ka dei ka wei na ki nongbah kiba paw ha ka thaiñ shatei lamihngi bad ïa ka jinglah jong ka dei ban ithuh.
“Ka nongbah Shillong ka ïaid ryngkat ryngkat bad ka thaiñ shatei lamihngi , hynrei kam shym la pyndonkam ïa ki jingdon jong ka bad kiba ka jylla Meghalaya,ka don,” u la ong .
U la bynrap da kaba ong , “ kaba don kam mynta ka dei ban ai jinghikai ïa ki briew shimet shimet halor ki kyndon jong ka CSR. Ka jinglong jong ngi ka dei ban kylla khnang ba ngin lah ban ïaid sha khmat.”
U la bynrap da kaba ong, ka jingai jinghikai ka long kaba don kam ban kyntiew ïa ka sap kaba ki don.
Na ka liang u Mark Laitflang Stone, u nongseng jong ka Avenues, u la ong kane ka dei ka sien ba nyngkong ba kum kane kan don hapoh ka jylla ban tyrwa shibun na ka bynta kito ki ba dang sdang ha ka seng kam seng kam.
