SHILLONG:
Kawei na ki seng bhalang jong ka jylla, ka Hynñiewtrep National Youth Movement (HNYM) ryngkat ki khynnah skul bad ki seng kynthei bapher bapher jong ka Ri Bhoi Sistrict, ki la pynlong ka jingïaïaid paidbah mynta ka sngi ka 9 tarik Jymmang ban pynpaw ka jingpyrshah halor ka jingshah leh beijot jong kawei ka khynnah kynthei kaba dang poh ka rta ha uwei u briew bad kane ka jingjia ka dei kaba la jia ha ka 30 tarik Ïaïong.
Ha ka jingpynrem jur kane ka kam riewkhlaw, kawei na ki nongïashim bynta ha kane ka jingpynpaw pyrshah, kaba la tip kyrteng kum ka Kong Bina Shadap, ka la pynpaw ka jingsngew diaw halor kane ka jingjia, bad kdew ba kane ka dei ka kam riewkhlaw kaba shyrkhei bad kyntu ruh ïa ki kynthei baroh ban ïeng tylli kawei ha kum kine ki kam beaiñ kiba la nangkynrei katba nangmih ki sngi ha kane ka jylla.
Ha kane ka jingïaïaid paidbah la wan ban donlang ruh da u President ka HNYM seng kmie u Bah Luis Dohtdong, u President ka HNYM Ri Bhoi u Bah Khrawkupar Warjri, bad kiwei de ki dkhot kane ka seng.
Na ka liang u Bah Khrawkupar u la pynpaw halor ka jingdawa ban shim ki sienjam pyntreikam kiba tyngeh katkum ki kyndon jong ka POCSO ha kum kine ki kam lehbor khnang ban ym jia shuh hadien habud.
