JOWAI:
Ka Save Hynñiewtrep Mission (SHM) ba kynthup ïa ka East Jaiñtia National Council (EJNC), Hynñiewtrep Youth Council (HYC), Hynñiewtrep Achik National Movement (HANM), Coordination of Ribhoi Peoples’ (CORP) bad ka Jaiñtia Students’ Movement (JSM) ka la pynlong ïa ka jingïaid paidbah ban pyrshah ïa ka Standard Operation Protocol (SOP) halor ka jingtih dewïong kynthup ruh ïa 8 tylli ki mat jingdawa halor u pud u sam, ka jingkynthup ïa ka ktien Khasi, Jaiñtia bad Garo ha ka kyrnit ba 8 jong ka Ri, ka bhah kam bad kiwei kiwei.
U secretary ka SHM, u Bah Roikupar Synrem u la ong, “ Ngi dawa ïa ka jingithuhnoh ïa ka ktien Khasi, Jaiñtia bad Garo namar ngi tip ba kan myntoi shibun eh ïa ki pateng jong ngi”.
Ha kane ka sngi da ki spah ngut ki la ïa shim bynta ha kane ka jingïaid paidbah ryngkat ka jingïadonlang u Bah Donbok Kharlyngdoh ba dei u nongïalam ka seng “Ka Sur Ka Bri u Hynñiewtrep” bad kiwei kiwei ki dkhot sengbhalang.
