SHILLONG:
U National Secretary ka Bharatiya Janata Party (BJP) u Rituraj Sinha u la ong ba ki paidbah ka jylla Meghalaya ki dei ban ïai shah halor ka jingdawa ïa ka Inner line Permit (ILP) bad ka jingkynthup ïa ka ktien Khasi bad Garo ha ka kyrnit kaba phra jong ka riti synshar jong ka ri India.
Haba jubab halor ka jingkylli mynta ka sngi, u la ong ba ki paidbah kim dei ban artatien hynrei ban ïai shah namar hap ban ïatai sani bha haba ïadei bad kane ka mat.
“Nga kwah ban ong ba kam dei ban don ka jingsngewthuh bakla ha ka jingmut jingpyrkhat jong ki paidbah, u Myntri Rangbah duh ka ri u Narendra Modi u la pynkylla ïa ka Look East Policy jong ka sorkar Congress mynshuwa sha ka Act East Policy, ha kaba ka song pisa na ka bynta ki kam pynroi ha ka jylla ka la kiew bun shah ïa kaba ki ju ïoh mynshuwa,” ula ong.
U la bynrap da kaba ong, “Ha kine ki phra snem hapoh ka sorkar BJP bun ki kam pynroi ki wan sha ki jylla ka thaiñ shatei lam mihngi, la ka dei ki surok bah, ki kad liengsuin ha kaba la plie ha kiba bun ki bynta, ka skhim ba kyrpang na ka bynta ki longïing kiba duna ha ka ïoh ka kot, ka jingpynsha ïing ei, ka bording bad ki wei kiwei”.
“Ngi sngewkmen ban ïathuh ba ngi hap ban ïakren sani bha halor ki mat kiba donkam, ngi hap ban peit ïa ki jingïoh jingmyntoi bad ki jingduh jingmyntoi khamtam ha ka kam jngohkai pyrthei lada ngi pyntrei kam ïa ka Inner Line Permit namar kan ktah ïa ka ïohkam ïohjam,” la ong u National Secretary ka BJP.
Na ka liang u Sinha u la ong ba ka kam jngohkai pyrthei kan ktah bha lada pyntrei kam ïa ka ILP. Ha ka jingshisha, u la ong ba ka BJP ka sngewthuh ba ka donkam ban ïada ïa ka jinglong kyrpang jongka jaitbynriew, ka rukom im bad ha ka juh ka por hap ban peit ïa ka roi ka par jong ka jylla. “Ka BJP ka dang peit bha bad kan sa shai halor kine ki mat hadien ka jingpynmih ïa ka mat elekshon”, u la ong.
Haba ïadei bad ka jingbyrngem ban weng noh na ka sorkar MDA halor ka jingkynnoh bamsap, na ka liang u Sinha u la ong ka BJP ka long pyrshah ïa ka bamsap bad ka thrang ban don ka sorkar kaba lait na ka bamsap bampong namar ka bamsap ka long kumba tuh na kiba duk.
“Ka sorkar NDA kaba lam khmat ha kine ki 8 snem ka ïeng pyrshah ïa ki Sorkar bamsap, bad ka dei ka kam ram jong kawei pa kawei ka seng saiñ pyrthei ban pyrshah ïa kum kine ki jaitkam,” u la ong.
Shuh shuh u la bynrap da kaba ong ki nongïalam jong ka jylla kiba kynthup ïa u President ka BJP Meghalaya bad ki nongaiktien ka seng kin hap ban peit ba ki paidbah kin ym don kano kano ka jingpynthud bad ban long ka sur na ka bynta jong ki hapoh ka ïingdorbar thawaiñ.
