NONGSTOIÑ:
Kum shi bynta ban ai jingkyrshan ïa ka jingïakhih jong u President rangbah ka seng VPP u Bah Ardent Miller Basaiawmoit, ka seng Voice of the Peoples Party (VPP) Nongstoiñ Konsitwensi, kala leh la ka jong ka bynta kata ban pyni ïa ka dak jong ka jingïakhih.
Kane ka jingïakhih jong ka VPP Nongstoiñ kala long da kaba leit rah placard ha khmat ka ïing sah u Bah Gabriel Wahlang, MLA ka Nongstoiñ kaba don ha Pyndengrei WKHD, kum ka dak ban pynrem ïa ka jingbymlah jong u MLA ka Nongstoiñ ban kren lem ha kaba ïadei bad ka reservation policy khamtam hapoh ka ïing dorbar thaw aiñ jong ka Jylla.
Haba ïakren sha ki lad pathai khubor u Joint Secretary VPP Nongstoiñ, u Samla Davis Franky Wahlang u la ong ba kane ka jingwan ban rah placard ha khmat ka ïing sah u MLA ka long ruh kum shi bynta ban pynbor ïa u ba un kren lem ha kaba ïadei bad kane ka mat kaba ktah ïa ki khun samla ka jaitbynriew.
Ym tang kata u la ong ruh ba ka na liang jong ka Seng ka dang shim ïa kane ka sienjam kum ka jingsdang bad ka lah ban dang bteng ha ki sngi ki ban wan haduh ba ka sorkar kan da sngap bad pynbeit thymmai ïa ka reservation policy kumba la dawa ka ka Seng VPP bad ki paidbah.
