SHILLONG:
U Myntri Rangbah ka jylla, u Conrad K Sangma u la pynlong ïa ka jingïalang ha ka 7 tarik Naitung bad ki briew na ka tnad jong ka koit ka khiah ha ka jingïadon lang ka myntri, ka Kong Ampareen Lyngdoh ban ïakren halor ban nang pynkhlaiñ shuh shuh ïa ki jingtei bad ban pynbha shuh shuh ïa ka jingai jingsumar ha ka jylla.
Kane ka sienjam ba la shim ka dei ka jingkitkhia ka sorkar ban pynbha ïa ka rukom ai jingsumar ïa ki paidbah ka jylla.
Kawei na ki jingïakren ha kane ka jingïalang ka long ban kynthup ïa ka koit ka khiah ki paidbah bad ki rukom ai jingsumar ba kyrpang hapoh ka tnad medical. Kane ka jingïakren halor kane ka jingtreikam ka thong ka long ban pynbha ïa ka jingtreikam ka jaka ai jingsumar, ban pynthikna ba ki jingai jingsumar ba kyrpang kin long kiba treikam na ka bynta kito kiba donkam.
Shuh shuh, ka sorkar jylla ka don ha ka lynti ban wanrah ruh ïa ka rukom pynkynriah kam ïa ki nongtrei ka koit ka khiah da ka lynti kaba khid bad kaba shai. Kane ka rukom treikam ym tang ba ka long kaba beit ha kaba pynkynriah kam hynrei kan pynthikna ruh ba kan don ka jingïabiang ha kaba phah ïa ki nongtrei ka koit ka khiah ha kylleng ka jylla. Kane ka thong jong ka sorkar ka long ban pynkhlaiñ ïa ka jingdon ki nongtrei ka koit ka khiah bad ban pynbiang ïa ka jingïoh jingsumar jong ki paidbah wat ha ki jaka ba kyndong tam ruh.
Da ka jingïohi ïa ka jingdonkam ban don ka jingïadei ki briew ka koit ka khiah bad ki paidbah, ka sorkar ka la thmu ruh ban wanrah da ki village health councils. Kine ki council kin long kum ka jaka ban ïakren bad phylliew jingmut hapdeng ki paidbah na ki shnong bapher bapher bad ki briew jong ka koit ka khiah, ban pynthikna ruh ba ka jingrai ïa ki jaka ai jingsumar kan ïabiang bad ka jingdonkam bad jingkwah jong ki paidbah.
U Myntri Rangbah, u la pynpaw ïa ka jingsngew skhem jong u ba kane ka jingpyrshang bad ka rukom treikam thymmai kan pynkylla dur ïa ka rukom ai jingsumar hapoh ka jylla. Ka jingphai khmat ka sorkar ban pynkhlaiñ ïa ka jingïoh ki paidbah ïa ka jingsumar kaba biang, ka jingïashim bynta ki shnong kan pynlong ïa ka jylla kaba lait na ki jingpang bad kaba seisoh.
