SHILLONG:
Ka Joint Action Committee (JAC) kaba kynthup ïa ka NEHUTA, NEHUNSA bad NEHUSU ka la kohnguh ban leit ïakynduh ïa u Vice-Chancellor (VC) jong ka skul bah NEHU, u Prof PS Shukla, mynta ka sngi Palei, na ka bynta ban ïakren halor ki khyndai tylli ki mat jingdawa.
Ka jingïakhih ba khlem buh por ba la khot da ka JAC ka la poi sha ka sngi kaba lai bad kaba la ktah ïa ka jingïaid beit ïaid ryntih jong ka rukom trei kam ha katei ka skul bah kynthup ruh wat ha ki kam kiba ïadei bad ka pule puthi ki samla.
“Ka JAC-NEHU kan ïakynduh ïa u Vice-Chancellor (VC), Prof. P.S. Shukla mynta ka sngi ha Conference Hall jong u VC,” pyntip u Shongknor ka JAC, u Prof Lakhon Kma myn ha ka sngi Balang. “Nalor kane, kan don ruh ka ‘General Assembly’ jong ka JAC habar jong ka ophis treikam u VC hadien ka jingïalang ban ïasam sha baroh halor ka jingmih na ka jingïalang bad ki dkhot ka JAC, ha kajuh ka por ban rai ïa ka sienjam nangne shakhmat,” u la ong. Na ka liang u Kma u la pynbna ruh ba ka jingïakhih sangeh treikam kan dang ïai bteng tad haduh ban da la lah ban shim ïa ka rai.
Ki khyndai tylli ki mat jingdawa ki long ban weng kam noh ïa u Technical Officer/Senior consultant ba la shu thung beaiñ, ka jingthung kam mardor ïa u Satutory Officer bad u University Engineer, ka jingpynbit pynbiang ïa ka University Health Centre, ban pynlait ïa ki nonghikai bad ki Technical Staff na kiwei pat ki jait kam ba bynshet da ka sorkar, ban Upload biang ïa ka NEHU Act, Statutes bad Ordinance ha ka Website jong ka NEHU, ban pynlong ïa ka Convocation kaba thikna man la u snem, ka rukom ai mark, ban kynthup ïa ki dkhot ka NEHUSU kum ki nongmihkhmat ha ka Academic Council bad ban peit biang ïa ka Educational Backward Area Quota naduh ki Block Level haduh ki Village Level.
