NONGSTOIÑ:
Ha kawei ka jingjia kaba sngewsih, ki ar ngut shipara ki la duh ei ïa la ka jingim hadien ba ka khyndew kaba don ha syndah ka ïing jong ki ka la twa bad tap ïa ki hapoh ïing.
Katei ka jingjia ka la jia hapoh Dommawleiñ jong ka shnong Pyndengrei WKHD, hynne ka step jong ka 17 tarik Jylliew ha ka por kumba 5 baje eiei ha ka por ba dang jur bha u slap.
Ïa kitei ki ar ngut kiba la khlad noh la tip kyrteng kum ka Cafinia Nongsiej 15 snem bad ka Maianylla Nongsiej 11 snem kiba na ka shnong Mawrok Mawlangniang na ka thaiñ Rambrai bad kiba shong wai ha Dommawleiñ jong ka shnong Pyndengrei.
Katkum ka tyllong khubor ba la ïoh lum la ong ba ki don 4 ngut shipara hapoh katei ka ïing ryngkat u kpa jong ki ha kaba ki ar ngut kiwei pat ryngkat u kpa ki la lait im bad shu mynsaw malu mala.
