SHILLONG:
U myntri rangbah ka jylla u Conrad K Sangma, mynta ka sngi u la pynlong ïa ka jingïalang bad ki Deputy Commissioner (DC) jong ki District baroh ban shim jingkheiñ halor ka jingpynjulor ka er-Langthari Sitrang, ha kine ki khyndiat sngi ba lah dep.
U Conrad u la ong ba ka jingpynlong ïa kane ka jingïalang ka long ban ïoh jingtip halor ka jingjulor kaba mih na kane ka er-Langthari bad ban shim ïa ki lad ban pynbha ïa ki jaka kiba la shah pynjulor. U la kyrpad ïa ki DC baroh ba kin pynkloi ïa ka jingmaramot bad ba kin phah jingïarap sha kine ki longïing kiba lah shah pynjulor ha kane ka erïong.
U myntri rangbah u la ban jur ïa ka tnad bording ‘MeECL’ ba kan pynbha bad pynïoh ïa ka bording ha kito ki jaka kiba lah shah ktah ha kane ka erïong. U la ong ba ka jingnoh synñiang sha kito ki longïing kiba la shah ktah ha kane ka erïong ka dei ban poi kloi katkum ka jingbthah lyngba ka tnad treikam National Disaster Response Force (NDRF).
Ki Deputy Commissioner baroh ki la ai jingkheiñ halor ki jingjulor jong ki ïing ki sem, ki surok, ki pyntha kba bad ki kwai ki tympew. Lah don ruh ki jingtwa surok bad ki jingshlei um ha ki bynta jong ka nongbah Shillong.
Arngut ki briew na rilum Garo bad na rilum Khasi ki la khlad na ka jingshah bat ha ka bording. Ki Deputy Commissioner ki la ïathuh ba ïa ka jingïarap lah dep ban pyllait sha kito ki longïing kiba mad ïa kane ka jingjulor bad ka jingshna na ka bynta ban pynïoh biang ïa ka bording ha kine ki jaka ba lah julor ka lah ïaid shaid shaid.
Kiba bun ki surok ba lah twa, lah dep ban pynkhuid. U Director jong ka MePDCL u la ai ïa ka report halor ka jingkyllon ki post elektrik bad u la ong ba ki nongtrei jong ka MeECL ki lah don mynta ha kine ki jaka ba julor ban pyndep ïa ka kam kaba ïadei bad ka jingpynïoh biang ïa ka bording ha kine ki jaka ba lah julor.
