NONGPOH:
Ha ka step jong ka 18 tarik Lber ha ka por 5 baje ei ei , ki nongïalam ka Seng Samla Shnong Umktieh Pyllun ha ryngkat ki nongïalam ka Khasi Students Union, Umktieh unit, ki la lap ïa ki dohkha kiba la per ha sla um jong ka Wah Umïam bad kaba dang hap hapoh u pud u samla ka shnong Umktieh Pyllun.
Haba ïadei bad katei ka jingpynïap bein ïa ki dohkha hapoh katei ka wah, kitei ki samla na katei ka shnong, ki la suba jur ba lah ban don ka kynhun ki riew dusmon, kiba la leit ban ber da ki kynja dawai bih hapoh katei ka wah, kaba la pynlong ïa ki dohkha ba kin ïap.
Ha ka kyrwoh, kaba la phah da u samla Cornelius Lyngdoh, Secretary ka Seng Samla Shnong Umktieh Pyllun bad u samla Richard Lyngdoh Nonglait, Secretary KSU Umktieh unit, ki la pynpaw ba kin buddien beit ïa ki briew kiba la pynïap dusmon ïa ki dohkha hapoh katei ka wah.
Ha kajuh ruh ka por, ki la buh ïa ka jingmaham kaba tyngeh, pyrshah ïa ki briew ba kim bit ban shoh dawai, Khangjar bad kawang bom ha wah Umïam ha ki bynta ban dang hap hapoh u pud ka shnong Umktieh bad lada lada lap ïa kiba leh pyrshah, ka seng kan sa leh ïa kaba donkam.
