NONGPOH:
Kawei ka jingjia ba la jia na ka daw ka jingther u lapbah u ba la neh kumba haduh lai kynta ei-ei ha ka kylla step jong ka 13 tarik Jylliew, uwei u rangbah u la shah rong noh ha ka wah kaba don harud ka surok National Highwya 6.
Ïa ka met jong une u rangbah la lap na ki sañium kiba don harud kane ka wah kaba dei ruh hajan ka district sessions court ha Ri Bhoi.
La ithuh ïa une u rangbah ba u don hapdeng ka rta 45 bad 50 snem bad katkum ka jing ïathuh u paralok jong une u rangbah, u la ong ba ki dang wad jaka rieh slap katba ki dang thmu ban leit phai shala ïing hapdeng ka jinghap u slap ba jur.
Katba ki dang shong rieh slap, uwei napdeng kine u la syntuid bad ur ha kane ka wah ha kaba u la shah rong ha ka umsaw. Hadien ka jingwad kaba la neh haduh kumba lai kynta, ryngkat ka jingïarap ki paralok bad ki nongleit nongwan, la lap pat ïa ka met une u rangbah na ki sañium.
Da ka jingtip ba une u rangbah ba la khlad u dei u nongshong shnong ka Umlyngkdait, la shimti noh ïa ka met jong u da ki parashnong jong u.
Haba ki pulit ki la wanpoi hakane ka jaka, la pynkit noh ïa ka met ba sah jong une u rangbah sha Civil Hospital Nongpoh khnang ban pyndep ïa ka post-mortem.
