SHILLONG:
Ka Aiom Lehkmen Jong Ki Hep Barit ba ju tip ïa ka kum ka Lympung Ki Khynnah ka Seng Khasi Seiñ Raij kaba 17, la lah ban pynlong ïa ka da ka tnat Seng Khasi Krang Diengïei Pyllun ha ka 14 bad ka 15 tarik Kyllalyngkot 2023, ïa kaba la wan ban ïashim bynta da ki hep barit jong ki Seng Khynnah ka Seng Khasi bad Seiñ Raij.
Ha kane ka sien kaba mynta, ka phang pdeng jong kane ka aiom lehkmen ki khynnah ba rit ka long “Ha La Thymmei Ban Tei Ïa Ka Lawei”.
U Kongsan ha ka sngi ba nyngkong jong ka jingplie ïa kane ka aiom lehkmen ki hep barit dei u MLA barim ka thaiñ u Bah Samlin Malngiang katba u kongsan ha ka sngi kaba ar pat dei u Ma Shape Paswet, General Manager District Commerce & Industries, Centre, Khliehriat.
Ha kine ki ar sngi jong ka lympung, la ïoh ruh ban pynlong ïaki kato katne ki jingïakob kum ka ïakob dro, mawpoiñ, siat khnam, pyni riam tynrai, ba la ïashim bynta shitrhem bha da baroh ki hep barit.
Haba phai pat sha ki prokram, la ïohsngew ïa ka jingpule ïa ka Sneng Tymmen, bud pat sa ki jingrwai, ki jingshad, ki skit ba lyngkot bad khamtam lei lei ka phawar, kaba la pynshongshit bha ïa kane kane ka lympung.
Shuh shuh la ïoh ruh ïa ka prokram ïasyllok hapdeng ki nonghikai Seng Khynnah ka Seng Khasi bad shlem hikai tynre jong ka Sein Raij, kaba sawdong ka lyngwiar dpei ba syiad, man la ki nonghikai seng khynnah ki la wan shakhmat ban pynpaw ïa kaei kaba ki don ban ong ne ban ïa pashat jingmut lem sha ki para nonghikai ïa kaba la pynïaid ïa ka da u Rgh Paia B Synrem Asst Genl. Secy Ka Lympung Ki Seng Khynnah.
La wan ban pynshit pynshngaiñ ïa kane ka lympung ha Krang da ki arngut ki Advicer jong ka synjuk u Babu Spiton Kharakor bad ka Kong Mira Dkhar, nangta la ïa don lang ruh u General Secretary ka Seng Khasi Kmie Rgh Hainess Marbaniang, President ka Seng Khih Lang Rgh H. Robin Kurbah bad kiwei kiwei.
Haba kren kum u kongsan jong ka sngi ba-ar jong ka jingrakhe, na ka liang u Ma Shape Paswet u ong ba ki hep barit, ki long ka lawei jong ka jaidbynriew bad kiba long artad kiba donbok tam ha ka jingim ka jong ki, namar ha ka bri u Hynñiewtrep Hynñiewskum, ym pat don satia ki shlem ban ïoh jinghikai, bad ban ïoh jingtbit shuh shuh ïa ka niam ka rukom ka dustur ka riti tynrai.
Nalor katta u Ma Paswet u la ong ruh ba ha ka por ba u dang khynnah, um juh ïoh lad ban ïashim bynta ha kum kine ki seng katta naduh ki snem 1970 haduh 1990 namar kum kine ki seng kim juh don ha kum kane ka por.
Dei na ka katta ka daw ba kaei kaba u ïohi ha kum kine ki por ka long ba ki briew ki don ïa katta ka jingieit niam katba ka jing-ngeit na ka mynsiem pat kam don, ne don pat kiba don ïa ka jingngeit hynrei ka jingieit pat kam don.
Dei ha kum kine ki por ba don pat ki paralok niam khasi niam tre ki shah ïalam bakla tad haduh ba kin da ieh noh ïa la ka jong ka tynrai bad shim kylliang noh da ka jong kiwei.
Nalor katta la ïoh ruh ïa ki jingkren ba kyrpang na ka Ba-la-ai Jingkyrmen Khongsni jong ka Seng Khasi Wahlyngkhat, ba la kren halor ka phang Ka Lawei Ki Khynnah Bad Ka Niam Khasi bad ruh ka jingkren na Skhembor Thangkhiew ka Seng Khynnah Shillong Pyllun ba la kren halor ka phang ka Seng Khynnah Ka Shlem Hikai Ia KaTynrai bad ka Akor.
Ha kane ka lympung ki nongïalam ka Lympung ki Seng Khynnah bad ka Seng Khasi Krang ki la pynkup burom ruh ïa ki briew kiba long ki nongprat lynti, nongkyrshan ïa ki kam jong ka Seng.
La pynkut ïa kane ka lympung da ka jingaiti ïa ka dongmusa jong ka lympung da u heprit Bhaboklang Ryntathiang sha u heprit Waiphang Suchiang ka Sein Raij Nongkynrih bad ka jingpynhiar ïa ka lama da u Rgh Spiton Kharakor bad pynbud da ka jingïaid paidbah.
