SHILLONG:
Ka sorkar jong ka jylla Meghalaya ha ka 14 tarik Nohprah, ka la ïasoi soskular bad ka Apollo Telehealth Foundation ban sdang ïa ka projek ba la khot ka “First Cancer Care” hapoh ka jylla.
Haba kren ha ka jingïalang, u Myntri Rangbah ka jylla, u Conrad Sangma, u la ong ba ka koit ka khiah ka dei kawei ka bynta kaba ka jylla ka ïakynduh shibun ki jingeh hynrei ka sorkar ka la synñiang pisa shibun na ka bynta kane.
Shuh shuh u la ong, “Ki don shibun ki jingeh haba phai sha ka koit ka khiah hynrei ngi la buh ka nongrim kaba skhem ban ïaleh pyrshah ïa ki jingeh baroh bad ka sorkar kan buh ka bynta kaba kongsan ïa ka koit ka khiah rynkat ka jingïatrei lang bad ka tnat ba dei khmih.”
U Myntri Rangbah u la ong ruh ba kane ka projek ka long kaba nyngkong eh ha ka Ri bad kaba donkam ym tang ïa ka jylla Meghalaya hynrei ka lah ruh ban long ka nuksa ïa ka Ri hi baroh kawei.
“Ka jingïasnoh kti lang ka World Economic Forum bad ka Apollo Healthcare kan long ka jingmyntoi ym tang ïa ka jylla Meghalaya, ha kaba ka jingpang Cancer ka kynrei, hynrei ïa ka Ri hi baroh kawei,” u la ong.
U Myntri Rangbah u la kyntu ruh ïa baroh kiba ïa donkti lang ha kane ka projek ba kin buh ha ki jingmut jong ki ïa ka thong, kata ban pynim ïa ki jingim. “Ka jingai mynsiem bad ka jingbtin lynti kan long ba yn lah ban pynim ïa baroh kiba shah ktah ha kane ka jingpang da kaba kloi ban lap bad ban ai ruh ka jingsumar kaba biang,” u la pynkut.
Ka jingthmu jong kane ka projek ka long ban ai ïa ka jingsumar kaba bha ha baroh ki liang ha kaba ïadei bad ka jingpang Cancer bad ban pyndonkam ïa ki teknology ki ban dang mih. Yn ai jinghikai ruh ïa ki nongtrei ka tnat naduh ki ASHA haduh kiba kham halor bad yn sdang ïa kane ka projek na East Khasi Hills Distrik. Ïa ka “Screening diagnosis” bad jingsumar yn leh ha ki NCD clinic ryngkat ka Pathology Lab ha Civil Hospital Shillong.
