SHILLONG:
U nongïalam ka Harijan Panchayat Committee (HPC) u Gurjit Singh, u la kyntu ïa ki paidbah nongshong shnong ha nongbah Shillong ba ki dei ban pynneh ïa ka shongsuk shong shngaiñ bad dei ban ieh ha ki pulit ba kin leh ïa la ka kamram.
Lah ban kdew hangne ba ha ka 18 tarik jymmang ki ar ngut ki nongñiah kali kamai, ki la shah shoh ha ki 5 ngut ki barjylla ha khyndai lad, ha ka ba ïadei bad kane ka jingjia ka la mih ka jingkynnoh ba ki ba la thombor ïa kine ki nongñiah kali ki dei na ka jaitbynriew Harijan.
Ha ba kren bad u Kynjatshai u Gurjit Singh u la pynpaw, “Mynta ngim pat lah ban ong eiei la ki khynnah jong ngi ki donkti ne em ban thombor ïa ki khynnah Khasi hynnin ka sngi hynrei la dei ban ieh ha ki pulit ba kin pynlong ïa ka jingtohkit ka ba pura”.
“Lada don na ki khynnah jong ngi ki ba donkti ai ba ki pulit kin kem hynrei ka dei ban long ïa ki ba donkti ym ban shu kynnoh ba tang ba dei bad ki jaitbynriew Punjabi ba ki la ïa kajia yn shu kem ïano ïano ruh katta kam dei ban long”, u la bynrap.
U la ong shuh shuh, “Ki pulit ki dei ban sngewthuh ba tang ban wanrah ïa ka suk ka saiñ ha ka jylla kim dei ban shu wan kem ïa ki khynnah jong ngi, khlem nongrim dei ban don ki sabud sakhi ki ba biang”.
“Ka jingïakajia ka dei ka ba ju mih naduh ki por mynshuwa bad bun ki khynnah jong ngi ki la shah shoh man ka por hynrei ngim ju kwah ban don ka jingïakajia hapdeng ki Khasi bad ki Punjabi ha kaba nga la ju kyntu ïa ki ruh ba kim dei ban ïa kajia badno badno”, u la bynrap.
U Singh u la ong ruh, “Kum kine ki jingïakajia ki ju jia hynrei kam dei ban mih ka mat ïapher jaitbynriew bad ka jingïakajia ka ju don hynrei na ka daw ka ba rit kin pynmih ïa ki khubor hamsaïa ban dang pynrhem ïa ka jingïakajia ka long kaba bakla”.
“Ngi la sah slem ha kane ka jaka bad ngi kwah ban don ka jingsuk ban im suk ngin ïoh ban kamai ka jih bad ka jingïakajia ka ju don ha man ki jaitbynriew hynrei man ka jingïa kajia ban shu kynnoh bad pynphriang ïa ki khubor hamsaïa pyrshah ïa ka jaitbynriew Harijan ka long ka ba bakla namar haba mih ka jingïakajia ka dei ban don ka jingïakren ban ïa pynsuk ban ïoh im suk”, u la ong.
U la bynrap, “Mynta ka step ki la wan ki pulit ki ba kynthup ïa u DSP ki la wan hiar sha kane ka jaka ban leh ïa ka jingtohkit ïa kiba suba donkti bad ki ba la shah rah tohkit ki pulit ki la dep ban pynlait namar ba kim dei ki ba donkti bad mynta ba ka jingtohkit kan dang ïaid bad kan shong ha ki pulit ba kin leh ïa la ka kamram hynrei dei ban pynneh ïa ka shongsuk shong shngaiñ”.
