SHILLONG:
Ki shipai ka Border Security Force (BSF) ki la pynpulom ïa ka jingpyrshang ki briew nabar ri ban rung tuh shapoh u pud u sam ka ri lyngba ki khappud ka East Khasi Hills.
Katkum ka kyrwoh ba la pynmih u Public Relation Officer (PRO) ka BSF jong ka Meghalaya, la ïathuh ba ki shipai ïada khappud ka pyrton 193Bn BSF ki la ïoh jingtip ia ki briew kiba thmu ban rung tuh na Bangladesh ha ka 6 tarik u Rymphang bad ki la pynjur ia ka jingpahara ha ki khappud. Hadien kane, ki shipai BSF ki la ïoh ban kem ïa 13 ngut ki briew na Bangladesh kiba wan rung tuh lyngba ka khappud ba don marjan ka shnong Dangar, East Khasi Hills.
Ki shipai ki la ïoh ban kem ruh ïa 3 ngut ki nongshong shnong ka India na West Garo Hills kiba ïarap ïa ki briew na Bangladesh ban rung tuh shapoh India.
Ki shipai BSF ki la ïoh ban bat ïa kine haba ki nong Bangladesh ki la mih na ka khlaw kaba don marjan bad ka International Border bad ki shong ha ka Tata Sumo ba la pynïeng lypa ha katei ka jaka.
Kine ki briew na Bangladesh kiba la shah bat ki la phla ba ki la rung sha India da kaba thmu ban leit sha Kashmir khnang ban ïoh kamai jakpoh da kaba bylla bad kiwei ki jingtrei. Ïa kine kiba shah kem la aiti sha ki pulit ka Dangar jong ka East Khasi Hills na ka bynta ban leh ïa kaba donkam.
