NONGSTOIÑ:
Ki samla pule ka dong ka thaiñ Nongstoiñ, ha ka 30 tarik Ïaïong, kila ïoh shibun ki jingmyntoi halor kumno ban jied ïa la ka jong ka kam na ka bynta ka lawei ba phyrnai jong ki da kaba ïoh lad ban ïashim bynta ha ka Career Symposium kaba tang shisngi ba la khot pynlong da ka Nongpyndeng Sport Social &Cultural Club (NSS&CC).
Ïa katei ka one day Career Symposium la ïoh ban pynlong hapoh ka ïing dorbar shnong Mawkhlam-Nongpyndeng ha kaba la kyrshan ïa ka NSS&CC da ka YESS Meghalaya, Directorate of Sport and Youth Affairs.
Ha kane ka sngi ki riew shemphang kiba la wan ban ai jinghikai ïa ki samla pule kumno ba kin jied ia ki laiñ pule bapher bapher khnang ba kin lah ban long kiba jop ha ka jingim ki kynthup ïa u Bah Manuel Badwar, IIM, Bah Goldenstar Nonglong, IIM bad i Kong K. Mary Wahlang bad hadien kane kala don pat sa ka ka jingiaphylliew jingmut iwei hadien iwei bad ka panel discussion.
La sakhi lang ïa katei ka sngi da ka jingdon ryngkat lang ruh u Myntri ka shnong Mawkhlam-Nongpyndeng u Bah Balentin Sohlang, u Secretary ka shnong u Bah Tiningstone Byrsat, u President ka NSS&CC u Bah Jovialroy Diengdoh, u Secretary ka NSS&CC u Dr. L. L Mawsor, u nomgai buit ka NSS&CC u Bah C. P Byrsat ki samla pule, ki riew rangbah bad kiwei kiwei.
