SHILLONG:
Hadien khyndiat sngi ba ka la don ka khubor ba ki don ki jingïap jong ki sniang ha ki katto katne ki bynta jong ka jylla bad watla kane ka jingpang kam pat long kaba la sar ïa ka jylla baroh kawei, hynrei na ka liang ka tnad Animal Husbandry & Veterinary ka la bthah ïa ki paidbah kiba ri sniang ba kin long kiba husiar. Mynta ka kynti pat la ïoh jingtip ba ka don sa ka jingpang kaba ktah ïa ka sniehdoh jong ki masi kaba la tip kum la Lumpy Skin Disease. Kane ka jingpang ka dei kaba long kum ki kynja prum lane ba thung kiba mih ha ka met jong ka masi baroh shi rynïeng.
Haba kren mynta ka sngi bad u myntri ka tnad Animal Husbandry & Veterinary, u Bah A.L. Hek, u la ong ba ka don ka jingsaphriang kane ka jingpang ha kine ki jaka bad ong ruh ba ka la don ka jingïalang bad ki heh sorkar kiba peit ïa kane ka tnad ban khanglad ïa ka jingsaphriang kane ka jingpang sha kiwei pat ki jaka bad ïa mynta kane ka jingpang ka don tang ha ki hynñiew tylli ki shnong kiba kynthup ïa ka Sumer, Mawlyngkhung, Umpyrdong Umden, Umkon Umden, Saiden Nongpoh bad Jyntru-Nogpoh kiba don hapoh Umsning C&RD Block hapoh Ri-Bhoi District bad ka Rangthong kaba don hapoh ka Mawkyrwat C&RD Block hapoh South West Khasi Hills District bad la khang ïa kine ki shnong ban wanrah ïa ki jingri shapoh bad shabar jong ka shnong.
“Kyrkieh kyrkieh ngi la don ka jingïalang bad u Secretary bad ki Director bad ophisar jong ka Animal Husbandry department ban shim ïa ki sienjam ban khanglad ïa ka jingsaphriang sha kiwei pat ki jaka”, la ong u Bah Hek.
Haba kren halor ki sienjam kiba ka sorkar ka la shim ban khanglad ïa ka jingsaphriang kane ka jingpang, u la Bah Hek u la ong ba namar ba kane ka dei ka jingpang ki don ki bynta ba ïadei bad ka jingsumar kaba ma u ruh um sngewthuh bad kaba bha ïa kiba don jingtip ban ïathuh ïa baroh kine ki lad jingïada ba dei ban shim.
U Bah Hek u la ïathuh ruh ba na ka liang ka sorkar ka la lum ïa baroh ki jingtip kiba ïadei bad kane.
Haba kren halor ka jingwan lynshop kawei hadien kawei pat ka jingpang kaba ktah ïa ki mrad ba ri ki briew, kata nyngkong ïa ka sniang na ka jingpang African Swine Flu bad mynta sa ïa ki masi na ka jingpang Lumpy Skin Disease, na ka liang une u myntri u la ong ba ka jingpang ki sniang kam dei kaba saphriang ha kylleng ka jylla, hynrei tang ha ki katto katne ki jaka.
La ïathuh ruh ba u Secretary jong ka Sorkar Meghalaya, AH & Veterinary Department u la pyntip ba ka jingpynshisha ba ka don ka jingpang LSD ha ki masi ka dei halor ka test na ka sample ba la leh da ka National Institute of High Security Animal Disease (NIHSAD) Bhopal haka 4 tarik Ïaïong, ha kaba ka sorkar ka la pyntip sha kine ki shnong ba ka don kane ka jingpang.
