SHILLONG:
Ki pulit ka Khliehriat, East Jaiñtia Hills District, ki la ïoh bat ïa arngut ki briew bad ïoh kurup ïa ki jingdih buaid, ki Mobile Phone bad ka pisa.
Katkum ka khubor ba la pyllait da u Jagpal Singh Dhanao, Superintendent of Police, DSB East Jaiñtia Hills District, Khliehriat la ïathuh ba ki pulit ha ka 15 tarik u Jylliew hadien ba ki la ïoh jingtip ïa uwei uba wanrah droks ba kyrteng u Thathang Touthang, uba dangwan na ka nongbah Aizawl jong ka Mizoram sha Shillong bad u la rah ïa ki jingdih buaid. Ka kynhun ka ANTF ryngkat ki nongtrei ka Khliehriat Police Station ki la pynap shrip ha BMS Fuel Station Nongsning. Ha ka por 5 baje eiei janmiet, utei u suba u la wan poi bad u la shah bat bad na ka pla jong u la lap ïa ki kynja powder rong stem-soh ba la thep ha ki 26 tylli ki jingsop sabon. Hadien ba la peit bniah, la lap ba ki dei ki droks Heroin kiba don 278.03 kram.
Shuh shuh, na ka met jong une u briew la lap ruh ïa 2 tylli ki Mobile Phone bad ka pisa kaba T.3,100.
Ïa une u briew la pynngat mukotduma ha Khliehriat Police Station hapoh ki kyndon ka NDPS Act bad ka jingtohkit ka la ïaid shaphrang.
Ha kawei pat ka jingjia, ha ka por kumba 6.15 baje janmiet jong ka 15 tarik u Jylliew, ki pulit ki la ap ktem hajan BMS Fuel Station Nongsning, haba kawei ka kali Mahindra Scorpio ba ñiah u Sujit Paul ka la pyrshang ban ïaid lait na ka jingshah talasi bad une u briew u la shah kem.
Ha ka jingtohkit, u la phla ba u kit ïa ki jingdih beaiñ ha ka kali, kaba u thmu ban rah sha Shillong. Haba la talasi ïa ka kali, la lap ïa 33 tylli ki synduk sabon kiba don ki powder rong stem-soh. Hadien ba la test la lap ba ki dei ki droks Heroin kiba don 353.34 kram. Na ka met jong une u briew la lap ruh ïa 2 tylli ki Mobile Phone bad ka pisa kaba T.4,700.
Une u briew ba la don 31 snem ka rta u dei na Karimganj ka Assam bad ka kali Mahindra Scorpio ka dei kaba don ïa u number MZ-01-D-6525.
Ïa une u brierw la pynngat mukotduma ha Khliehriat Police Station bad pynngat ha ki kyndon ka NDPS Act bad ka jingtohkit ka la ïaid shaphrang.
