SHILLONG:
Ka bynta jong ka Purno Sangma Stadium kaba dang tei thymmai mynta hapoh Tura, West Garo Hills ka la twa noh ha ka step jong ka 22 tarik Jylliew ha ka jingther jong u lapbah uba la khyrwit ïa ka jylla ha kine ki ar sngi ba lahdep.
Ka jingther u lapbah lapsan uba khlem sangeh uba la khyrwit ïa ka Rilum Garo naduh ka por 5 baje jong ka step 22 tarik Jylliew ka la pynlong ïa ka jingtwa jong ka bynta kane ka madan bad wanrah ïa ka jingjulor.
Kane ka bynta jong ka stadium kaba la twa ka dei kaba khlem da don ki kynroh ba biang ban khanglad ïa ka jingtuid ka khyndew bad kane ka jingther jong u lapbah ka la pynlong ïa kane ka khhyndew twa noh.
Ha kaba ïadei bad kane ka jingjia, na ka liang u Deputy Commissioner ka West Garo Hills, mynta ka sngi, u la thung da ka kynhun jingtohkit Magistrate halor ka jingtwa ka shibynta na ka kynroh jong ka madan Purno Sangma Stadium, ha Tura ka ba dang shu dep plie dang 6 bnai mynta.
Na ka liang u Deputy Commissioner Jagdish Chelani, u la kyntait ban kren eiei halor kane ka jingjia, da ka ba ong ba “Ka dang kloi palat ban kren eiei, halor kane ka jingjia bad tang hadien bala pyndep ïa ka jingtohkit bad la aiti ïa ka kaiphod, ka bor Sorkar kan sa lah ban leh eiei halor kane ka kam”.
U Chelani u la bynrap shuh shuh ba la thung ïa ka kynhun jingtohkit Magistrate halor kane ka jingjia bad na ka liang u Assistant Commissioner un sa khmih ïa kane ka kam, lyngba ka jingtohkit.
U la ong, “Mynta ka ba donkam hi ka long ban pynkhuid shuwa ïa ka khyndew na kane ka jaka ba twa,bad ka long ka ba donbok ba ym shem la don kano kano ka jingjia ba sngewsih na kane ka jingtwa kane ka kynroh”.
Lah ban kdew hangne ba ïa ka Purno Sangma Stadium la plie ha ka 16 tarik Nohprah 2022 shwa ka election MLA, ha ka mang tyngka ka ba long T.127.7 Klur ka balah ban ngiam 10,000 ngut ki briew.
Mynta ka step ka jingtwa kane ka madan ka ba dang shu dep ban plie mynta dang 6 bnai ka la la mih ki jingkynnoh ka ba jur ha ka ba la kynnoh ba ka don ka jingpyntrei torti ïa ka ne ka stadium namar kam don ka jingpynkhreh ba ïada ïa ka jingjulor lada wan u slap.
Hadien kane ka jingjia, na ka liang u Myntri Rangbah ka jylla u Conrad K Sangma u la thoh ha ka Twitter jong u ba la dep ban pynkhuid ïa ka khyndew kaba tuid na kane ka madan.
Na ka liang u Myntri Rangbah u la ba la bthah ruh ïa ki bor pynïaid bad ka tnad ban pynlong da ka jingtohkit bad ïa ki kontraktor ba kin ai ïa ka kaiphod halor ka daw jong kane ka jingtwa.
Ïa kane ka PA Sangma Stadium ka don ar bynta ha ka Indoor Hall, kaba nyngkong ka don ïa ka swimming and squash bad ruh kumjuh ka gymnasium. Ka bynta ba ar jong ka Hall ka don ïa kiba bun kiwei pat ki jait jingïalehkai kum ka badminton, table tennis, bad basketball. Ïa kane ka football stadium la plie ha u Nohprah 2022 bad ïa kine ki ar tylli ki indoor hall la khmih lynti ban pyndep ha u Nohprah 2024.
Ïa jingpynwandur jong kane ka stadium la leh da ki design agency ba pawnam ha ka ri kiba la pynkhreh ïa baroh ki jingdonkam ban pdiang ïa ki jingïalehkai national bad international.
Ïa kane ka project la pyntrei da ka Hindustan Steelworks Construction Limited, kaba dei ka Agency jong ka Sorkar India hapoh ka Ministry jong ka Housing and Urban Affairs.
