SHILLONG:
U Symbud Myntri Rangbah ka jylla uba dei peit ruh ïa ka tnad Home (Police), u Bah Prestone Tynsong, ha ka 6 tarik Jymmang u la ïathuh ba la aiti noh ïa ka met jong u nongñiah trok, u Bah Roning Nongkynrih uba la kynnoh ba shah siat ïap ha ki shipai BSF ha ka janmiet jong ka 5 tarik Jymmang, sha kiba haïing hasem ha ka 6 tarik Jymmang bad ka jingleit on tep kan long ha ka 7 tarik Jymmang.
Haba kylli ïa ka daw jong ka jingshah siat ïap, u Bah Prestone u la ong, “Ngam tip kaei kaba la pynlong ïa ki shipai BSF ban shim ïa kum kane ka sien jam ban siat; ngam lah ban ong eiei namar ka jingtohkit ka dang ïaid shakhmat. Ai ba ka aiñ kan leh ïa kaba donkam.
U la kyntait ruh ban jubab ïa ka jingkylli la yn shim kam pyrshah ïa ki shipai BSF kiba la kynnoh donkti ha kane ka jingjia.
U Bah Roning Nongkynrih uba dei na ka shnong Jalynteng hapoh ka Raid Nongkynrih, East Khasi Hills District, ryngkat bad u nongbuh trok uba dei ruh u para jong u, ki dang don ha lynti na Laitlyngkot ban leit buh ïa ki masi ha ka jaka hajan Pynursla mynba ki la ïakynduh ïa ka trok BSF kaba la tan ïa ki bad pynsangeh ïa ki katto katne meter hakhmat jong ki.
U nongbud trok u la ong ba ki shipai BSF ki la hiar na ka trok bad dei hangta ba la sdang ka jingsiat, kaba la jia ha ka por 11 baje eiei mynmiet ha ka 5 tarik Jymmang.
