MAWKYRWAT:
U MLA ka Mawkyrwat Constituency u Bah Renikton L. Tongkhar myn ha ka 13 tarik Nohprah, 2023 ha ryngkat ki katto katne ngut ki rangbah ka thaiñ u la leit jurip hi ïa ka surok ba la pyntrei lyngba ka PMGSY skhim ba la pyntrei da u wei u Contractor uba la sangeh noh ban trei ïa kane ka surok,
Halor kane ka bynta haba ai jingkren ha ki lad phathai khubor u la ong ba na ka liang jong u, u la dep ban ïa kynduh ïa u Myntri jong ka sorkar jylla ba dei peit ïa ka tnad PWD Roads ban kyrpad ïa u ban ïoh mang pisa thymmai (sanction) biang ïa kane ka surok kaba la sah teng ban pynpoi ha ki 6 tylli ki shnong kata ha ka thaiñ Mawkhyrwang shaduh Nongnam kaba yn duna ïa ka 16 km tam eiei kiba don haduh 6 tylli ki shnong kiba la shem lanot shisha na kadaw ba kim don ïa ka surok kali da kaba ki hap ban ïaid da ki kjat kumba 3 kynta ei ei.
Halor kane ka bynta u la ong ba u Myntri jong ka tnad PWD u la kular ban mang pisa thymmai noh bad ngi dang ap sa ïa ki kot ki sla na ki trai jaka kiba hap ban ïaid lyngba kane ka surok ha kine ki thaiñ bad ha dien kata na ka liang ki Engineer jong ka tnad PWD kin sa leh ïa kaba donkam. Kyrmen skhem ba kane ka surok kan ym don shuh kino kino ki jingpynthud bad ba kan ïaid beit ïaid ryntih ban pynpoi surok noh ha kine ki shnong kiba don ha duh 6 tylli ki shnong.
