SHILLONG:
U myntri rangbah ka jylla u Conrad K Sangma haka 27 tarik Risaw 2022 u la leit ban jurip ïa ka shnong Mawdiangdiang, Mawpat bad Mawkasiang ban khmih halor ka jinglong jingman ban pynkynriah ïa ka Secretariat bad kiwei kiwei ki ophis sorkar shane ka thaiñ.
Ha ka jingïakren bad ki lad pathai khubor, u myntri rangbah ka jylla u la ong ba la mang ïaki jaka ha Mawdiangdiang ban tei ïa ki ophis treikam bapher bapher jong ka sorkar, kumta donkam ka jingpynbeit bad la kumno kumno 220 akar ka jaka kan donkam na bynta ka Secretariat bad kiwei kiwei ki tnad treikam.
Shuh shuh u la bynrap ba ka sorkar kan wad ka lad ban pyn ïasoh ïa ka sor Shillong bad ki thaiñ ba marjan lyngba ka surok thymmai.
Hadien ka jingkynriah jong ki ophis sorkar sha ka thaiñ Mawdiangdiang, ka jingkhmih lynti ka long ban kham kylluid ka sor Shillong bad kane kan wanrah ïa ka jingkylluid khamtam ha ki surok bad lynti syngkien.
Kane ka jingkynriah jong ki ophis treikam bapher bapher, kan pyn stang ïaka jingdheng kali ha ka nongbah kaba la tuh ïa ka por jong kiba bun ki nongleit nongwan man ka sngi.
