SHILLONG:
U Chairman jong ka Regional Committee jong ka West Khasi Hills District u Bah Renikton L Tongkhar, u la ïathuh ba ka jingeh ban pynbeit ïa u pud u sam hapdeng ka Assam bad Meghalaya ha ki thaiñ Langpih ka mih na ka daw ba ki shnong ki ba sah ki Nepali ki kwah ban leit sha Assam.
Haba ïakren bad ki lad pathai khubor mynta ka sngi, u Bah Tongkhar u la ong, “Haduh mynta ki shnong kiba sah ki jaitbynriew Nepali ha Langpih, ki kwah ban leit sha Assam hynrei kine ki shnong ki dei kiba tawiar da ki shnong Khasi bad Garo kiba kwah ban don bad ka Meghalaya, kumta ka mih ka jingeh”.
U Bah Tongkhar u la ïathuh ba ha ka jingïalang kaba la long ha Nongstoiñ, la shim ïa ka rai ban leit ban jurip ïa kine ki jaka hynrei haduh mynta ym pat lah ban buh hynrei yn sa pynbeit ba ha ka taïew ban wan kane ka Committee kan sa leit ban jurip ïa ka thaiñ Langpih.
“Hadien ka jingleit jurip, ngin sa khot biang ïa ka jingïalang bad ki briew kiba don bynta lang ha kane ka phang bad ngin sa pynkhreh ïa ka jingai jingmut na ka bynta ka sorkar jylla ha ka ba ïadei bad ka Langpih sector”, u la ong.
“Na ka liang ka Committee na ka West Khasi Hill kan ïaleh katba lah ban pyndep noh kloi ïa ka jingjurip katkum ka jingbthah ba la bynshet ïa ngi”, u la bynrap.
U Bah Renikton u la ïathuh shuh shuh ba ka Assam kam pat dep ban thaw ïa ka Regional Committee bad ïa kane la pyntip da u myntri ka Assam hynrei na ka liang jong ka Regional Committee na Meghalaya kan ïaid shakhmat.
U Bah Tongkhar u la ong shuh shuh, “Ka jingpynbeit ïa u pud u sam na ki thaiñ Langpih ka dei kaba bun ki jingeh namar ba bun ki jaitbynriew kiba sah ha kane ka jaka kynthup ïa ki Nepali, ki Khasi bad ki Garo hynrei ngin ïaleh ban pynbeit”.
“Kumba ka la bud ïa ki kyndon ha ka wat ba nyngkong, ka wat baar ruh ngin bud ïa kata bad ka jingkwah jong ki nongshong shnong hi kan long kaba donkam tam”, u la bynrap.
U Bah Renikton u la ong ruh “Ngi kwah ban leit shatei ka long ban peit ïa ka jinglong jingman ki jaka, kynthup ïa ki pud ki sam ki ba la pynlong lypa da ka mariang khnang ban ïoh ban rah ha ka jingïakren”.
U Bah Tongkhar u la kdew ruh ba ka Langpih kan dei kaba jwat ban pynbeit namar ka jingdon ki nongshong shnong Nepali, kiba kwah ban leit sha Assam.
“Ha kaba ïadei bad ka Langpih ka dei kaba eh hynrei ngin wad ïa ka lad ban pynbeit, ki jaitbynriew Nepali ki basah ha kine ki shnong haduh mynta kim kwah ban don ha ka Meghalaya bad ki kwah leit sha Assam hynrei ka jaka ba ki sah ka shah tawiar hapdeng ki shnong ki ba la sah da ki Garo bad Khasi”, u la ong.
“Kumta ngi kwah ban sngewthuh bad ban leit jurip bad ban ïakren bad ka Assam ba kine ki shnong kiba kwah wan sha Assam ki shah tawiar da ka ki shnong Khasi bad Garo bad kan long kaba bha ba kine ruh kin hap sha Meghalaya”, u la bynrap.
