SHILLONG:
U Chief Executive Member (CEM) ka Jaiñtia Hills Autonomous District Council (JHADC) u Ma Thombor Shiwat, u la kynnoh ba ka jingthmu ka Karbi Anglong Autonomous Council (KAAC), ban buh ïa ka khyrdop khrong khajna hapoh ka Shnong Khanduli ka dei ba ka don jingthmu ban pynthud ïa ka jingpynbeit ïa u pud u sam hapdeng ka jylla Assam bad Meghalaya.
Ha ba kren sha kilad pathai khubor, u bah shiwat u la ong ba “ngi dang kyrmen ba ka jingkhot u Deputy Commissioner ka West Jaiñtia Hills ïa ka Deputy Commissioner ka West Karbi Anglong, ban don ka jingïakren ka long ban don ka jingshong suk shong shngaiñ ha ki ne ki thaiñ kat ba ym pat lah ban pynïaid ïa ka jingpynbeit u pud u sam hapdeng ka Assam bad Meghalaya hynrei kalong pynban kum ka jingwan aiding ïa ki nongshong shnong ha Khanduli da ka jingkam, ïa ka ne ka jaka ba ka hap ha Assam”.
“Ka JHADC ka pynshisha ba ka Khanduli ka dei ka ba hap hapoh ka jingpeit ka JHADC, namar ka don ïa u rangbah shnong, ka dang ïoh sanat na ka District Council bad ka don ïa ki kot ki pata ki ba biang kat kum ka jingithuh bad aibor ïa ka District Council; bad ngi ieng skhem ba ka Khanduli ka hap hapoh Meghalaya”, u la bynrap.
“Nga pynrem jur ïa ka jingthmu, ka DC ka West Karbi Anglong ,namar ba ka kam ïa ka Khanduli bad ngi la don ka jingïapynbeit ban don ka jingïakren hapdeng ki MDC ka KAAC bad ka JHADC ha kato ka sngi ba jia ka to ak jingjia hynrei ki khlem wan hynrei ngi ieng ha ka nongrim ba ka dei ka ba hap hapoh Meghalaya”la ong u CEM.
U Ma Shiwat u la ong ruh “Halor ka jingbuh khyrdop ka KAAC, mynno mynno kam ju don hynrei kyndit kynsan ki la shu wan buh ïa ka khyrdop sha poh ka shnong bad ka la dei hi ba ka mih ka jingbitar jong ki nongshong shnong ka Khanduli bad ngi pynrem jur ïa ka jingleh donbor jong ki”.
U la bynrap “Lashai ka sngi ngin shong ïa ka jingïalang ki Regional Committee ban ïakren halor ka jingpynbeit ïa u pud u sam .Ngim lah ban ong kaei ka jingthmu ka Assam hynrei ngi la ju ïakren ban pynneh pynsah ïa ka status quo ban don ka suk ka saiñ hynrei hapdeng kane ki dang pyni ïa ki kam lehbor ka ba imat ki kwah ban don ka jingïakajia ka jingïaumsnam ban shim kabu ïa ka kam pynbeit upud u sam”.
“Man ka por hi ngi ju pynsngew sha ki nongïalam sorkar ha ka ba ïadei bad kane ka bynta bad ka sorkar ruh ka la ju shim khia, dei na kane ka daw ba ki la thung da ka Regional Committee , hynrei ka jingwanbuh ïa kane ka khyrdop ngim tip balei kiwan buh ïa kane bad kaei ka jingmut sha lyndet”u la ong .
