SHILLONG:
U President ka seng Khasi Student Union (KSU) u samla Lambokstar Marngar ula pynrem jur halor ka jingsiat ïap ki shipai Border Security Force (BSF) ïa u Bah Roning Nongkynrih ha Mawshun kaba la jia ha ka miet jong ka 5 tarik u Jymmang, 2023, U la ong ba na ka liang ka seng kam lah ban pdiang ïa kane ka jingleh. U la ong ruh, “Ngan ym ong shuh ka Border Security Force hynrei ngan ong da ka Bharat Security Force namar ki la pynjaw snam ïa u paradoh parasnam jong ngi”.
Ïa kane u la kren ha ka jingïalang jied ia ki Nongkit-kam ba thymmai jong ka Central Executive Committee (CEC) jong ka samoi treikam u snem 2023-2026.
Ha kane ka ilekshon, la jied biang ïa u samla Lambokstarwell Marngar ban ïalam biang ïaka KSU naka bynta u snem 2023-2026 hadien ba khlem don ba ïeng ban ïakhun ïaka kam President.
Ha kane ka ilekshon naka bynta ki dkhot CEC jong u snem 2023-206 nalor ka kam president, la shem ba khlem don ba ïeng ban ïakhun ïaka kam vice president bad General Secretary bad la bat biang hi da u samla Biangbor Paliar bad u samla Donald V Thabah.
Kiwei ki dkhot ka CEC kiba la shah jied thymmai ki kynthup ïaka kam Assistant General Secretary la bat da u samla Ruben Najir, Organising Secretary da u samla Raymond Kharjana, Education Secretary Pynkmenlang Sanmiet, Information and Publicity Secretary Pynshaiborlang Rani, Office Secretary Spaindonsing Lyngkhoi, Sports and Cultural Secretary Eric A Nongkynrih bad ïaka kam Environment Secretary la bat da u samla Shiningstar Kharbuhkhiew.
Haba kren hadien ka ilekshon CEC 2023-2026, u President ka KSU u la ong, “Kum ki dkhot ba pura ka KSU da kawei ka buit ka bor ngin ïa khyllie ïa ki dulir ym da ka ktien hynrei da ka kam. Ngim don suloi ngim don kuli, ngi don tang artylli kata ka jingim bad ka snam bad wat ailad ba ka jingim jong ki samla jong ngi kan sepei noh ha sla pyrthei namar ka pateng kaban sa wan kan sa buh dak jingkylli ba ki samla ki leh aïu ha kato ka por”.
U samla Lambokstar u la ong, “Kaba kongsan ka long ba ngi ju kren man ka por, haba ngi long ki nongïalam ka KSU ngi don shibun ki jingeh hynrei ka nongrim ka jingïaishah bad ka jingsngewrit khamtam ka jinglen lade kadei ban ïai don ha ngi”.
U la ong ba ngi ju ïohsngew ïa ka jingbeiñ jingkynthoh hynrei katba ki nang beiñ ki samla ki dang kha roi.
U samla Lambokstar Marngar ula ai khublei ïa baroh ki dkhot kiba la wanshim bynta ha kane ka ilekshon naka bynta ban pynthikna ba ka jingjied ïaki dkhot ba thymmai ka long kaba seisoh.
U samla Lambokstarwell ula ïathuh ba shen ka CEC kan sa lum ka jingïalang naka bynta ban pynrung dkhot biang sa ïa kiwei ki samla sha ka seng bad haka juh ka por ban pyrkhat ïaki sienjam ba ka seng kan shim nangne shakhmat.
Naka liang u vice president barim ka KSU u bah Danny Khyriem ula ïathuh ba kila don 33 kyrteng ki ba ïakhun ha kane ka ilekshon bad na kine 3 ngut kila jop suk namar khlem don ba ïeng ban ïakhun pyrshah.
