SHILLONG:
U Director General of Police (DGP) u L.R Bishnoi, u la ong ba ka jingtohkit ha kaba ïadei bad ka jingshah siat ïap jong u Bah Roning Nongkynrih ha Mawshun, kaba hap hapoh ka Pynursla, ka la ïaid shakhmat bad mynta ka la don hapoh ka Iingbishar. U la ong ruh ba na ka liang ki shipai Border Security Force (BSF) ki la kem ïa ki shipai BSF kiba la donkti ha ka jingsynreit kuli bad ka jingtohkit ka dangïaid shakhmat.
Ïa kane u la kren hadien ka jingïakynduh ki heh pulit ka jylla bad ki shipai BSF ïa u Symbud Myntri Rangbah ka jylla u Bah Prestone Tynsong ha Secretariat, Shillong.
Haba kren sha ki lad pathai khubor, u Bishnoi u la ong ba ha kane ka jingïakynduh bad une u Symbud Myntri Rangbah ka jylla ha ka jingïadonlang ki shipai BSF, la ïakren shibun ki mat bad na ka liang ki shipai BSF ki la pynthikna ba kin tohkit ïa kane kat kum ki kyndon jong ka aiñ jong ki.
“Ngi la ioh ban ïakynduh ia u Symbud Myntri Rangbah ka jylla ryngkat ki shipai BSF, la ïoh ruh ban ïakren shibun ki mat bad na ka liang kine ki shipai BSF ruh ki la pynthikna ba kin buddien ïa kane kat kum ki kyndon jong ka aiñ jong ki”, la ong u Bishnoi
U Bishnoi u la ong ba la ïakren bad ki shipai BSF ban aiti ïa ki sha ka tnad pulit ïa kito ki shipai BSF kiba la donkti ban siat ïap ïa u Bah Roning Nongkynrih
Kine ki 3 ngut ki shipai BSF kiba la shah sospon kynthup ïa u head constable u Moni Singh, u Constable u Sengel Singh bad u Constable u Kdam Kishore. Ha kajuh ka por, ki BSF kila sospon ïa u Moni Singh uba la siat haduh 3 kuli na ka suloi SMG Barreta bad lah phah ïa u sha ka BSF Headquarter ryngkat ka hukum ba um dei ban mih khlem da ïoh jingbit.
Haba ban biang ïa ka jingkylli halor ka jingdonkam jong ki BSF ban aiti sha ka tnad pulit ka jylla, u DGP u la ong ba ka tnad ka banjur ïa kane katkum ka hukum ka Ïingkashari. U la ong ruh ba namar ba ki shipai BSF ki dei ki shipai jong ka sorkar pdeng, kumta ki hap ban ïaid katkum ki kyndon jong sorkar pdeng bad ka sorkar jylla ruh kam lah ban pynshitom ïa ki shipai khappud namar ba katei ka kynhun shipai ka don la ka jong ki aiñ ba ka hap ban bat. Ka sorkar jylla kam lah ban pynbor ïa ki shipai khappud ban leh ei ei ban pynshitom ïa ki nongsiat namar ba kane ka kynhun shipai BSF ka don la ki jong ki aiñ kumno ban pynshitom ïa ki briew jong ka, lada ki leh bakla.
Kumban shu pynkynmaw ba ha ka miet jong ka ka 5 tarik Jymmang, 2023 u Bah Roning Nongkynrih u la shah siat ïap ha ki shipai Border Security Forces (BSF) ha ka surok Pynursla-Dawki hajan ka shnong Mawshun ha Pynursla. Une u rangbah ba la shah siat ïap, u don arngut ki Khun ha Mawshun, u dei na ka shnong Jalynteng ba hap hapoh ka Raid Nongkynrih, East Khasi Hills district. Ka jingshahsiat ïap jong u ha ki shipai khappud kadei halor ka jingsuba ba u dei u nongkhaïi beaiñ ïa ki masi.
