SHILLONG :
Arphew tylli ki shlem ai jinghikai ba la tip kum ka Chief Minister’s Youth Centres (CMYC), kaba la shimkhia ban pyntreikam da ka sorkar jylla Meghalaya hapoh ka jinglamkhmat u Myntri Rangbah ka jylla u Conrad K Sangma, ki dei kiba la mang na ka bynta ban nangkyntiew bad bynrap shuh shuh ki rukom ai jinghikai ha ki skul kiba la don lypa bad pynleit jingmut halor ka jinglah ban ïoh ka jaka ai jinghikai kaba long kylluid bad ba shngaiñ sha ki jaka bad ki thaiñ ba kham kyndong.
Kine ki shlem ai jinghikai ki dei kiba la tip kum ki self-designed learning spaces lane ki jaka kiba lah ban thaw pynwandur thymmai dalade, ba la pynwandur bad pyntreikam lang lyngba ka projek jong ka DEFY bad Sauramandala Foundation ban wanrah ki rukom ai jinghikai kiba lah ban thaw ki lad aikam aijam na ka bynta ki nongshong shnong kiba don ha ki jaka kyndong jong ka jylla.
Ym shym la mang satia ka rta na ka bynta kiba wan shah hikai bad baroh ki lah ban wan sha kane ka shlem ai jinghikai ha kano kano ka subjek ba ki kwah ba kynthup naduh ka shet jingbam, ka kam shna dieng, coding, ba ïadei bad ki tiar ba pyndonkam da ki bording, ka sports, arts, ka jinghikai tem napdeng kiwei de.
Ïa mynta, ki lah ban buh la kajong ka thong bad thaw pynwandur hi la ki jong ki jingmut ba ki don hadien ba jied ka subjek ba thikna. Ka CMYC kan kynthup ruh ha ka liang jong ka sport bad arts khnang lah ban kham poi sha kiba bun ki paid ha ka imlang ka sahlang.
Ki samla ha ki jaka kyndong ki kham shem jingeh ban ïoh pyndonkam ki bor technological bad kiwei de ki kam pyntbit ba ki nongshong shnong ha ki jaka sor ki suk ban ïoh. “Ngam pat ju ïohi ïa ka kor computer ha shirta ka jingim dei tad haduh ba ngan da leit ha Sales force Trailblazer Community Lab. Nga hap ban kiew 1500 tylli ki mawkyndon na ka shnong ba nga shong nga sah ha Diengsong ban poi ha katei ka jaka ai jinghikai, hynrei kaei kaba nga ïoh hapdeng ba nga wan ha kane ka jaka ka long kaba kham don jingmut bunshah.” La ong bad pynpaw kawei ka khynnah kaba dang 13 snem ka Damelarisha Khongsit, kaba la wan ban shah hikai ïa ka 3D Printing bad ka jingpyndonkam ïa ki Electronics ha Sohrarim.
Kum ka jaka ai jinghikai ba don jingïadei bad jingshem thymmai bad ki nongseng kam lajong na ka bynta ki nongshong shnong ha ki jaka kyndong, kine ki jaka ki dei kiba lah ban bynrap halor ka jingpyrshang jong ka sorkar na ka bynta ban pynpoi sha ka thong jong ka Meghalaya Youth Policy.
Ka CMYC projek ka ïarap ban pyntreikam halor ka jinglah ban ïoh jinghikai ba ïadei bad ki digital bad kyntiew halor ki sap ki phong bad “ki jinghikai kiba la pynwandur dalade” kum ka matpdeng halor ka jingshah hikai. Mynta ki lah ban don bynta halor ka jinglah ban wad ki lad ki lynti halor ka jingeh ba kynduh ha ka imlang ka sahlang jong ki da kaba pyndonkam ki thymmei kiba suk ban ïoh ban tem ki jingeh ba ka imlang ka sahlang ka mad bad kynduh.
Arngut ki nongshah hikai, ba kynthup ka Dari Armynia Diengdoh bad Alphaios Nongrum, ha ka jingpynpaw ka jingshem jong ki kum ki nongshah hikai, ki la pynpaw halor ki kam ba ki shah hikai bad ba ki la jied- “Hapdeng ba ngi shah hikai ban shna sabon, ngi pyrshang ban pynleit jingmut halor ka jingeh ba kiba bun ki nongshong shnong ki mad bad kynduh.
Kine ki sabon ki dei kiba lah ban ai jingmyntoi lada mih pyrshen, ka jinglong tyrkhong ka sniehdoh, ka jingransti ka sniehdoh napdeng kiwei de. Ngi shem ba kine ki jingshah hikai ki dei kiba lah ban kiew bad kwah ban tip shuh shuh hapdeng ba ngi ïamir lang ki jingtip bad ki dkhot ka imlang ka sahlang”.
Ba hap hapoh ka jingkhmih jong ka sorkar jylla lyngba ka Smart Village Movement ba la tip kum ka Salesforce Trailblazer Community Lab ha Sohrarim bad Nongwah, kine ki shlem ai jinghikai ki dei kiba la nang pynïar sa ha ki 20 tylli ki jaka kum ka Chief Minister’s Youth Centers (CMYC) ha kylleng ki distrik jong ka jylla Meghalaya.
Ha kine ki jaka ai jinghikai, ki nongshah hikai ki dei kiba la lah ban shna ki projek kum ka shuki kiba lah ruh ban pynkylla jingthiah, Water Fountain cum Aquarium, ki kali ba pynïaid da ki remote controlled, Barbeque grill ba pyndonkam da ki tiar kiba ym lerkam shuh, ka jingmaramot ïa ki emergency lamp da kaba pyndonkam da ki bording napdeng kiwei de.
