SHILLONG:
Ha kine ki khyndiat taïew ka Sorkar ka la thaw ïa ka Komiti ba kyrpang kaban ïakren halor ka Roster system ha kaba ki nongïalam jong ki seng sainpyrthei ka jylla ki dei ki dkhot jong kane ka Committee.
Ha ka sien shong kaba nyngkong kane ka Committee kaba la thaw kyrpang da ka Sorkar ban ïakren halor ka roster system. Ka Chairperson jong kane ka Committee ka Kong Ampareen Lyngdoh haba kren bad ki nongthoh khubor hadien ka jingïalang ka la ong, “Ka Committee kala rai ban pynïar ïa ka jingïatai jong ka da kaba shim ïa ka sienjam ba kin thoh sha ka Sorkar jylla ban shah ïa ki ban ïakren lang halor ka reservation policy, ïa kane ka rai ka Committee kan phah sha ka Sorkar ba kan mynjur.”
Ka Kong Ampareen ka bynrap da kaba ong ba ka Committee ka la ïoh ban ïakren bad ki seng saiñpyrthei bapher bapher kiba wan ban ïashim bynta ha kane ka jingïalang kynthup ïa ka Garo National Council kaba mihkhmat da u nongïalam jong ka lyngba ka Video Conference, bad tang ka wei ka seng saiñpyrthei ka bym shym la wan ban ïa shim bynta kata ka VPP.
“Ka Committee ka sngewdei ba ka VPP ruh ka dei ban donlang ban ïakren halor ka reservation policy bad ban pyni ïa ki jingkdew jong ka kiba don ha ka policy, ka la kyntu ïa u President barangbah jong ka ne ka seng ba wan ïashim bynta bad pynsngew sha ka committee ïa kaei kaba ki don ban ong halor ka Reservation Policy,” ka la ong.
Shuh shuh ka Kong Ampareen kala ïathuh ba na ka liang ka Committee kan phah ïa kane ka jingai jingmut sha ka Sorkar bad ka shong ha ka Sorkar ban mynjur la kan kynthup lang ïa ka mat halor ka reservation policy ha kane ka juh ka Committee kaba dei halor ka Roster ne kan don da kawei pat ka Committee halor ka Reservation Policy.
Shuh shuh ka Kong Ampareen ka la ïathuh ba ka Committee kan sa ïakynduh biang ha ka 31 tarik mynta u Jymmang ha Secretariat ha ka por 2 shiteng nohphai sngi.
Kum ban shu pynkynmaw u President ka VPP u ba dei ruh u MLA ka Nongkrem u dang don hapdeng ka jingshah thngan ba khlem buh por ha parking lot jong ka Additional Secretariat ban dawa na ka Sorkar ba kan pynbeit thymmai noh ïa ka reservation policy.
