SHILLONG:
“Ka dei ka jingmad kaba shyrkhei,” la ong ki khynnah pule kiba la shah ktah ha ka jingjia ha ka jylla Manipur kiba mynta ki la sngew kylluid mynsiem katba ki la poi suk ha ka jylla Meghalaya.
Ha ka jingïakren ha ka 6 tarik Jymmang, ki khynnah pule ki la ïathuh ïa ka jingshem jong ki bad ki la ong ba ka long kaei kaei kaba sngewtieng.
“Ka jingshem kyllum jong nga ka long kaba sngewsyier namar ba ngi khlem tip kaei kaba jia. Haoid, ka don ka jingïakhih hynrei ha ka thaiñ jong ngi , da ka jingisynei jong u Blei, kam shym la don kano kano ka jingjia bad ngi don hapdeng ka jingïada. Ka long kaba sngewtieng namar ngi ïoh sngew ïa ka jingbthei bad ki jingsiat suloi. Ngi lah tang ban duwai,” la ong ka Licola Amanda Tariang, kawei na ka kynnah pule kaba la wanphai na ka jylla Manipur.
Haba pynpaw ïa kajuh ka jingshem, kawei pat ka khynnah pule, kata ka Sanriiariti S Kharbuli ka la ong ba kim sngew shngaiñ shuh. “Ngi la ïoh ka jingpynthikna na ka liang ki nongpynïaid hostel ba ngi long kiba la shah ïada bad ngi shngaiñ. Hynrei ka jingsawa shabar ka long kaba jur bha. Ngi la shah bthah ban pynlip noh ïa ka light , ka la shu dum beit ngaiñ. Ngim tip shuh kaei kaba jia shabar namar lah shah khang ïa ka internet ruh bad ym don shuh ka lad ban ïa kren ne ïa kynduh ,” ka la bynrap.
“Na kaei kaba ngi la ïohi da ki jong ki khmat, ka jinglong jingman ka long kaba la tehlakam. Ha kine ki por baroh shi katta, ngim tip kaei kaba jia namar la shah khang ïa ka internet. Hynri nga sngew ba shen kan sa long noh kaba jai jai,” la bynrap uwei pat u khynnah pule, u Hazekhayah Diengngan.
Ki khynnah pule ki dap da ka jingsngew nguh ïa ka sorkar jylla bad kumjuh ïa ki shipai Indian Army ba ki la pynthikna ïa ka jingwan phai suk phai saiñ jong baroh sha ka jylla Meghalaya.
“Nga dap da ka jingsngew nguh ban wanphai biang ha la ïing. Nga ainguh ïa u Blei uba la ri la sumar ïa ngi. Ka sorkar jylla bad ka Indian Army ki la ïarap shibun eh. Nga sngewsih ba kiwei ki samla pule ki dang sahkut hangto. Nga kyrmen ba kin leit phai da kaba suk sha la ki jong ki jylla. Ka sorkar jong ngi ka long ka kloi (ban buddien ïa ka jingwallam noh ïa ki samla pule),” la ong ka samla Sanriiariti S Kharbuli.
“Nga kwah ban ong khublei shibun eh ïa ka sorkar Meghalaya bad ka Indian Army. Ngi burom ïa phi,” la bynrap ka samla Licola Amanda Tariang.
“Nga ainguh ïa u Blei ba u la ri la sumar ïa ngi bad ruh ïa ka sorkar Meghalaya kaba la shim khia ban ngin wanphai da kaba suk bad ruh ïa ka Indian Army kaba la ïarap bad ïada ïa ngi lyngba kane ka jingwanphai jong ngi,” la ong ka samla Hazekhayah Diengngan.
Kumba 66 ngut ki samla pule la wallam noh na ka jylla Manipur kaba don ha ka jingïakulmar naduh ka 5 tarik Jymmang.
