SHILLONG:
U President ka Voice of People Party (VPP) u Bah Ardent Miller Basaiawmoit, u la ong ba ka jingmih ban ïa khih ka VPP na ka bynta ban dawa ban pynbeit ïa ka Reservation Policy kam dei na ka bynta kino kino ki riew shimet hynrei kadei na ka bynta ban dawa ban pynbeit ïa ka jingeh ka ba mih na ka ne ka Policy.
Ha ba kren sha ki lad pathai khubor u Bah Ardent u la ong ka jingïaleh kam dei na ka bynta uno uno u riew shimet, ne kano kano ka jaitbynriew, ka jingïaleh ka long ban pynbeit ïa ka jingeh ka ba mih na ka Reservation Policy.
“Kane ka jingïaleh jong ngi ka long ba weng ïa ki jingeh ki khun samla ki ba wad kam, ngim donpor ban ïakren ïa ki kam shimet jongno jongno hynrei ngi don ïa ka kamram ka ba khraw ban saiñdur ïa ka ri bad ka jaitbynriew”, u la ong.
“Kum ba ngi ju ong ba ka VPP ka dei na ka bynat ban pynim pat ban pynbha pat bad pynkylla dur pat, te kum ka party ka don ïa ka kamram kaba kham kraw bad ym ban ïakren halor ki kam shimet jong ki briew”, u la bynrap.
Ha ba kylli halor ka jingbym don ka jingïatylli, namar halor kane ka mat mih ka jingïakawang ktien para nongïalam, u la ong, “Kane ka jingkynthoh kam dei tang ha ka jaitbynriew jong ngi, ki jingïapait ïa pra, ki jingïa kynad kam dei tang ha u Khasi hynrei kiwei kiwei ki jaitbynriew ki ïa shrut hi, hynrei ngim dei ban pynleit jingmut than ïa kita ki jingsniew kiba don ha ka jaitbynriew”.
“Mynta ki ong ba ki bun ki ba pyrshah ïa kane ka jingïakhih hynrei ha ka jingshisha u bun u ba kyrshan bad teng teng ngi la shu pynheh ïa ka ba sniew, bad ha kane ka khep mynta halor ka ne ka mat, ka jaitbynriew kan shem la ïapait hynrei ka nang ïatylli shuh shuh namar ka dei ka nongrim kaba biang kaba skhem, bad da lynti ka ba beit kum u nongïalam, ki paidbah ruh ki ai ka jingkyrshan hynrei lada ka lynti kam biang te u paidbah ruh um lah ban ai ka jingkyrshan”, u la bynrap.
“Lada phi ïakhih khlem ka nongrim ka ba biang, u ban kyrshan ïa phi lehse un dei tang u briew u ba ieid shimet ïa phi ne u ba sngew ïadei hynrei mynta ka kynti halor kane ka mat ka don ka jingïaryntih kumba ka long bad nangne shakhmat kan nang kham skhem ka jingïatylli”, u la ong shuh shuh.
U Bah Ardent u la ong shuh shuh, “Lada kwah tang ban woh daw woh dong, phi lah ban kynthoh da kumno kumno ruh hynrei mynta ki paidbah ki sdang ban sngewthuh ïa ka jingshah ktah na ka Roster naduh u snem 2022 ba la pyntreikam ïa ka”.
“Ha u snem 2022 ngim pat long MLA, hynrei kum ka party ka ba dang shu mih ngi ïohi ïa ka jingeh ki khun samla bad kane ka pynlong ïa ngi ban shimkhia halor kane ka mat”, u la bynrap.
U la ong shuh shuh, “Ka jingkynthoh ba ka VPP ka shim kabu halor kane ka mat, ka dei tang ka jingkynthoh sngew kutlad jong ki, namar ka jingjop jong ngi hynrei ngi sngew ba ngim donpor ban pynsngap ïa kata namar ngi la kren shai ba ka ka jingpynbeit ïa ka Reservation Policy kam dei tang na ka bynta ban ïoh kam sorkar ïa baroh ki ba wan sha ka jingïakhih”.
“Na ka liang jong ngi, ngi la kular ban weng ïa kane ka jingeh hynrei ngi khlem kular ban baroh kin ïoh ïa ka kam sorkar bad ïa kata wat u paidbah u ba wan ban shim bynta ha ka jingïakhih ruh u tip bha bad u ai ka jingkyrshan ïa kane”, u la bynrap.
