NONGSTOIÑ:
Ka Hill State People’s Democratic Party (HSPDP) Youth Wing jong ka Ri-Muliang Zone ha ka sngi Saitjaiñ jong ka taïew ba la lah ka la pynlong ïa ka jingialang bah ha shnong Langpih ryngkat ka jingïadonlang u bah K.P Pangniang u President ka HSPDP uba dei ruh u kyrtong ka Seng na Rambrai Jyrngam Constituency.
Haba kren ha kane ka jingïalang u bah K.P Pangniang u la ong ba kiwe ki Seng saiñ pyrthei kila kylli ba ka la leh aiu ka Seng HSPDP bad ka jubab ka long ba ong ba ka Seng HSPDP ka la noh synniang shibun ïa ka Jylla ban pynïoh bun phew tylli ki skul naduh kapor u Maieid Hopingstone Lyngdoh (bam kwai ha Duwar u Blei).
Ha kaba iadei pat bad ka thaiñ Langpih, u bah Pangniang u la ong ba ka HSPDP ka la leh ïa shibun ki kam bah ba khaw kum kaba pynrung ïa ka Langpih ha ka thup thep vote bad ha ka khanasumari bad ka la pynkylla ia ka thaiñ Langpih da kaba pynïoh ïa ka Police Outpost bad ïa ka Langpih Polling Station kaba la jah noh haduh 35 snem.
“Ka HSPDP ka la ia ïeng lang bad ki paid Garo ban na ka bynta ban ïakhun ïa la ka jong ka Jylla ka Garoland bad Khasi Jaiñtia State bad ka HSPDP ryngkat kiwei ki Jylla ka thaiñ shatei lam mihngi kan sa leit ban pynher ïa ka Lama ha khmat ka Parliament ban ïa dawa ïala ki jong ka Jylla ba thymmai” u la ong.
U la ïathuh ruh ba kiwei ki Jylla na ka thaiñ shatei lam mihngi kum ka Kuki Land na Manipur, ka Amrit Tripa Land na Tripura, ka Karbi Anglong, Bodo bad kiwei kiwei kin sa ïakynduh lang ha Mawphanlur ban ïa shong jingïalang ban ïatai halor ka jingdawa Jylla lajong.
Kiwei de kiba la ai jingkren ha katei ka jingïalang ki kynthup ïa u bah Sandonbor Ryntathiang u President HSPDP Youth Wing Sengkmie, ka Kong Badariti Lyngdoh Nonglait ka President Women’s Wing HSPDP Sengkmie bad kiwei kiwei.
