SHILLONG:
Ka Hynniewtrep National Youth Front (HNYF) ka la ai por shitaiew ban khang khyrdep ïa ki 18 tylli ki khyrdop khrong pisa ki ba la pynïaid da ka Khasi Hills Autonomous District Council (KHADC).
Haba kren sha ki lad pathai khubor mynta ka sngi, u President ka HNYF EKH, u Bah Bless Dkhar u la ong ba ka seng kan aipor shitaiew ïa ka District Council ba kan khang khyrdep ïa ki 18 tylli ki khyrdop khrong pisa ki ba don shilynter ka surok bah.
“Ïa ka khyrdop khrong pisa jong ka District Council, ym pat ju ïohi ba kan khot tender hynrei ngi ïohi tang ba ki treikam ha ba ngi ïaid sha rum sha neng khamtam ha ki surok bah”, u la ong.
U la bynrap shuh shuh “Don na ki Khasi, ki ba la wan ban ujor sha ka seng ba ki shah lum khajna na u synsar, u shyiap, u maw kumta ter ter bad ka District Council kam shem la burom ïa ka ïingbishar ha ka jylla”.
U la ong kum ba ka long mynta hi ka ïingbishar kam pat shah ban ban plie ïa ki khyrdop ha surok bah khlem ka jingïoh jingbit na ophis ka Deputy Commissioner bad na ki bor pynïaid ka National Highway.
U la kynnoh ruh ba “Lada leit sha kine ki khyrdop, kin don beit tang ki briew jong ki CEM jong ki EM jong ki MDC, ki ba don ka jingïadei bad ki High Level”.
U la bynrap shuh shuh, “Lada kane ka pisa ka ba ki la lum kan wanrah jingmyntoi ïa ka jaitbynriew ngim sngeweiei hynrei ki briew ba trei hangto tang shisnem la ïoh ban thied flat, la ïoh ban thied ïing thied ki kali”.
U Bah Dkhar u la ong “Ngin buh por ïa ka District Council tang shitaïew ba kan khang khyrdep ïa ki ne ki khyrdop, bad lada kim lah ban leh kumta ka seng kan sa phah ka jingujor sha ka ophis ka Deputy Commissioner, lane sha u Chief Secreatary kat ba dei ka lynti bad lada ki bor sorkar ruh kim lah ban khang ka seng ka kloi ban hair bad ban khang khyrdep hi”.
U Bah Bless u la buh ruh ïa ka jingkylli ba ka pisa ka ba ki la ïoh ban khrong beaiñ na ki 18tylli, ki khyrdop mano ba ïoh jingmyntoi. Ka seng kan buddien mano ba donkti mano ba ïoh jingmyntoi, mano ba khrong na surok bad ka seng kan thad madan ïa kine.
U la kynthoh ruh “Ka jingdon ka District Council kam shem la wanrah jingmyntoi eiei namar ka District Council ka dei ban thaw aiñ ban ïada ïa ka jaitbynriew hynrei kam long kumta namar ba ki leit ha District Council tang ban long MDC ban ïoh long MLA bad kadei ka jaka tang ban ai NOC ïa ki company ba heh baheh hynrei u Khasi ym ïoh eiei”.
“Ha District Council, mynno phi ju ïoh sngew ba ju don ka jingpynban halor ka jinglaitkam ka jingthep kam thep jam ka ju long ka ba sop sop,tang ki ba don ka jingïadei bad ki heh ki haiñ hangto ki ïoh ïa ka kam hynrei ki wei ki ba la nang la stad kin hap ban shu ïaid ha surok khlem kam khlem jam”, u la ong.
“Ka HNYF ka sngew ba ka District Council kam ai jingmyntoi eiei namar ba kam lah ban ai ka jingshakri ka ba khuid ïa u paidbah . Ka jinglum khajna ka District Council kam don jingmyntoi eiei namar ba lada dei ba ka ai jingmyntoi balei kim thep kam ban siew tulop hynrei haduh mynta ki nang tang ban shu rah beit da ka pliang ban khrong ïa ka pisa na ka sorkar India”, u la bynrap.
“Dei na kata ka daw ba kim nud ban pyneh ïa ka sorkar pdeng ha ba shah khang ïa ki mar pohkhyndew. Ki ong ngi don ka khyrnit ba hynriew ban ïada ïa ka khyndew ka shyiap, haei ngi long trai mano ba khang ïa u dewïong ka sorkar India, mano ba khang ïa u maw ka sorkar India, balei ka District Council kam lah ban ïa khun halor ka ne ka jingshah khang”, la ong u President ka HNYF .
