U MLA barim ka Sohra uba dei ruh u Chief Executive Member (CEM) jong ka Khasi Hills Autonomous District Council (KHADC) u bah Titosstarwell Chyne u la ong ba ka jingdawa District kam dei kaba thymmai.
“Kane ka la sdang naduh u Snem 2009 ha kaba la thaw ïa ka Joint Action Committee bad ha u snem 2018 la thaw ïa ka ka South East District Demand Forum ha ka por ba u bah Donkupar Roy u dang im. Hadien ka ilekhson u la lum ïa ka jingïalang ha Ramakrishna Mission bad la aiti ha ka forum ban leh ïa kaba donkam,” ong u bah Chyne.
U la ong ruh ba ma u bad u bah Balajied Synrem, u Nongmihkhmat na Shella, ki la ïakren haba ïadei bad kane na ka por sha ka por.
“Ma nga wat la nga dei tang u MDC nga la rah ïa kane ka mat haduh mynta,” u la ong.
U la ong ha ki khyndiat por ba la dep ka forum da ka kynhun ka la ïa kynduh ïa u Myntri Rangbah u Conrad Sangma hadien ba la pynbna district thymmai ïa ka Mairang.
U MDC ka Sohra u la ong ba u Myntri Rangbah ha kato ka por u la ong sha ki ba ki don ki jaka ba ha ban peit bha bad ki don ki bynta kiba don ki jingeh dei na katta ka daw ba kim lah ban ïakren sha khmat.
U bah Chyne u la ong ba na ka liang ka jong u shimet u ïeng halor ka nongrim ban dawa kyntiew ïa ka Sohra Civil Sub-Division sha ka district.
U la ong ruh ba tharai kane ka mat dawa Sohra district kan ym dei ka mat ilekshon namar baroh ki briew kum ki nongïalam hima kum ki Syiem, ki kynhun sengbhalang bad ki nongmihkhmat ki don bynta lang halor kane.
“Ha kane ka por ba mynta ban pynlong mat ilekshon ïa kane kam long kaba dei, ka dei ka jingbakla bad ialam bakla ïa ki paidbah,” ong u CEM ka KHADC.
U bah Chyne u la ong ban ai district ïa ka Sohra ym lah ban rai da ka sorkar ne da ki riew shimet hynrei ka kan dei ka rai jong baroh.
“ U MLA ka Sohra bad Shella, ki MDC jong ki artylli ki constituency, ki Syiem bad baroh ki khlieh synshar shnong ki dei ban ïatai halor kane ka mat namar ban ai district ïoh kan kut tang ha kaban buh mawnongrim,” u la ong.
Khem da jer kyrteng ïano ïano, u MDC ka Sohra u la ong ba u shem ba ka long kaei kaei kaba thamula ba kane ka mat ka mih kynsan kynsan tang namar ba don kiba kwah ban ïakhun ilekhson.
Dang shen u kyrtong ka National People’s Party (NPP) na Sohra, u bah Allan West Kharkongor u la ong ba ki paidbah ka Sohra ki khmih lynti ban ïoh district na kane ka sorkar kum ka jingai sngewbha Khrismas.
