SHILLONG:
Ka jingdawa ïa hok ban bhah kam bhah jam hapoh Jylla kat kum ka jingkylla ka por bad ka jingbun paid hapdeng u Garo, Khasi bad Jaiñtia kam mut ba ngi pyrshah Sorkar ne pynïapher jaidbynriew.
U Working President ka Jaiñtia Student Movement sengkmie u Bah Jimmy Raul Kharmuti u la ong ba ka jingïakhih ki nongshong Shnong jong ka Ri Jaiñtia hapoh ka Chatri, Jaiñtia Coordination Committee for Reservation Policy, 1972 (JCCRP) ka dei halor ka nongrim ban dawa ïa ka hok longbriew manbriew ha ka rukom bhah kam bhah jam hapoh Jylla, khlem kano kano ka jingthmu ban pyrshah ïa ka Sorkar Jylla ne ban pynïapher jaidbynriew hapdeng u Khasi, Jaiñtia bad Garo hapoh ka jylla Meghalaya.
“Ka jingdawa ban review ne ban ammend ïa ka Reservation Policy 1972, ka dei ban bhah ïa ka jingïoh kam hapoh ki kam Sorkar katkum ka jingkylla ka por bad ka jingbun paid hapdeng ki nongshong shnong jong ki briew ka Meghalaya,” u la ong.
U la bynrap ruh da kaba ong ba lada peit ki Jaidbynriew Khasi bad Jaiñtia kiba don ka jingbun paid da 14 lakh tam katba ki Garo ki don tang kumba 8 lakh tam, ha kaba ka jaidbynriew Khasi, Jaiñtia kala tam ha ka jingbun paid kumba 6 lakh tam, halor kane ka nongrim ka Sorkar jylla Meghalaya kala dei ban review lane ban amend noh ïa ka Reservation Policy 1972 kaba la rim bad noh shiliang.
Na ka liang u Bah Jimmy u ong ruh ba ka jingkren jong uwei na ki Nongïalam na Garo ba um dei ban ktah bad ka ding halor ban review ïa ka Reservation Policy, 1972 ban lait na ka jingum snam hapdeng u Garo bad u Khasi, Jaiñtia ka dei kaba bakla bad ka bym don nongrim.
“Ban dawa ïa ka hok ba long solansor ha ka rukom bhah kam bhah jam lyngba ka Reservation Policy katkum ka jingbun paid kan wanrah bad pynneh pynsah ïa ka jingburom kylliang para jaidbynriew hapoh ka jylla, khnang ba ki pateng ba hadein habud kin suk kin saiñ,” u la ong.
Ha ka juh ka por u Working President ka JSM u la pynrem ïa ka jingkren u Education Minister ka jylla ba ka jingdawa ban review ïa ka Reservation Policy ka lah ban wanrah ïa ka jingtuklar ka Court lada jia ba tam ka bhah palat 50%, une u Nongïalam ula ong ba ka Judicial/Court ba don burom ka long kaba stad bad ka ailad ruh ïa ka Legislative (Sorkar Jylla) ban peit bad pynbiang ïa ka bhah kam bhah jam kat kum ka jinglong jingman ka jaka bad ki briew ba shong basah ha ka jylla khnang ban lah ban wanrah ïa ka bha ka miat bad ka shongsuk ka shong saiñ hapoh ka jylla khlem ka jingleh shiliang bad noh shiliang ha shynshar khadar.
Na ka liang u Bah Jimmy Raul Kharmuti u la ong ba u don jingkyrmen ha ka Sorkar jylla wat lada ka shim por hynrei u ngeit skhem ba ki dang bishar bniah halor ka Reservation Policy bad kin leh ïa kaba dei eh ha ka por kaba biang, kumba ka Kmie bad u Pa ki juh pyrkhat na ka bynta ka bha ka miat ki khun ki kti bad kim ju aili ba ka jingieid lane ka bhah bynta jong ki khun ki kti kamdei ban noh shiliang, kam juh ruh ka Sorkar kaba long kum ka Kmie u Kpa kin sa bishar bad pyntikna ba ki khun ki kti jong ka kiba long ki nongshong Shnong ka jylla kidei ban ïoh ka bhah ka bynta kat kum ka hok jong ki khlem da noh shiliang shano shano ruh na ka bynta ka suk ka saiñ bad ka roi ka Par hapoh ka jylla Meghalaya waroh kawei.
