SHILLONG:
U Symbud Myntri Rangbah ka jylla u bah Prestone Tynsong, u la ong ba ka sorkar Meghalaya Democratic Alliance (MDA-II) kan shim khia ban pynbeit halor ka jingpyntreikam ïa ka roster system, hynrei halor ka Reservation Policy kane ka sorkar kan ym treh ban ktah eiei.
Ha ba ïakren bad kiladpathai khubor u bah Tynsong u la ong , “halor ka roster ngi la dep ban ïashong ban bishar bad batai bha ha ka jingïalang ki kynhun myntri , ha ka jingïalang ka MDA bad ha ka All party meeting bad ha ba la bishar la sngewthuh ba ka jingpyntreikam ïa ka roster kan long naduh ba ka ingbishar ka la ai ka jingbthah bad ngin ïaid katkum ka percentage” .
Halor ka jingdawa ka VPP, u Bah Prestone u la ong, “Ka VPP ka dawa ban shim ïa ka jingbun briew namar ki paid Khasi Jaiñtia ki khambun ban ïa ki paid Garo bad kadei ka jingshisha bad ngi ruh ngi ong ba ka dei hynrei phin hap kheiñ jingkheiñ namar ka jingbthah ka ïingbishar Supreme Court ka long ba hapoh 50% ngin hap pyrkhat ïa kata”.
“Lashai ngin ong ba lehse ngin kyntiew ïa ki Khasi Jaiñtia bad na Garo ngin pynhiar kaei ka ban mih na kata namar ba ngin hap pyrkhat ruh ïa ka mat ban mih na ka Judicial kan long kumno? Nga sngew ba kane ka Reservation Policy, ka ba la thaw da ki nongïalam mynshwa ïa mynta ngin ym lah ban ktah, ïoh ngi duhnong hadien ïoh ngi babe kylla pat junom la junom, kum ka jaitbynriew Khasi Jaiñtia kumba la long mynta kan bha ba ngin peit shwa tang ai ka Roster”, u la bynrap.
U Bah Prestone u la ban jur ba ka Sorkar MDA kan pynleit jingmut bha mynta ïa ka jingpyntreikam ïa ka Roster System bad dei na ka ne ka daw ba ka sorkar ka la dep ban khot ïa ka jingïalang MDA ka All Party Meeting bad ha ki sngi ban wan ngin khot sa ïa ka jingïalang ki briew ba don bynta (stake holder), ban pynshai ban pynsngewthuh halor ka roster system kumba ka long”.
“Ka VPP ka dawa ban bishar ïa ka Reservation Policy kumba ka long ïa kane ngim lah ban ïakren eiei halor kamat hynrei ngin shim beit shwa ïa ka roster system”, u la bynrap.
