SHILLONG:
Ka Myntri ba dei peit ïa ka tnad ka koit ka khiah ka jylla, ka Kong Mazel Ampareen Lyngdoh, ha ka 23 tarik Lber ka la hiar sha Ganesh Das Hospital ban jurip ïa kane ka hospital.
Ka jinghiar ka Kong Ampareen ban leit jurip ïa ka ne ka hospital ka long hadien ba ka la mih ka khubor ba ki doctor na ka ne ka hospital kim shym la ai ka jingsumar kaba biang ïa ka wei ka longkmie ka ba la wan ban phah sumar ha ka ne ka hospital.
Lah ban kdew hangne ba ka Kong Dris Mynsong, ka dei ka long kmie na ka shnong Thadrang ka ba la kynnoh ba ki doctor ka Ganesh Das Hospital ki la pynslem ban ai ka jingsumar ïa ka, wad hadien ba la khlad i khyllung i ba ka la pun ha kpoh.
Ka Kong Mazel Ampareen Lyngdoh, haba kren sha ki lad pathai khubor ka la ong ba ka jingwan ban ïa kynduh ïa ka Kong Mynsong ka long hadien ba mih kawei ka khubor halor ka jingbym ai jingsumar bha ki Doctor kane ka Hospital .
“Hynrei ha ka jingïa kynduh mynta ka sngi , la lap ba kum ba la pynmih ïa kane ka khubor kam shym la long kumta namar ba kane ka longkmie ka la dep ban tip ba i khyllung i ba ka la pun I la dep khlad lypa ha kpoh bad ka jingwan jongi ka long ban phah sumar bad mynta ki la ai da u dawai ba in lah ban kha hi ïa ine i khyllung”, ka la ong.
Ka la bynrap shuh shuh, “Ngin sa wad jingtip kumno kane ka khubor ka bym shisha ka mih namar wat kane ka longkmie ruh ka la tip lupa ba i khyllung i la khlad lupa naduh na ing”
Ka Kong Ampareen ka la ong shuh shuh ba “kum ka minister, nga kwah ban pynshimkhia ha ka ba ïadei bad ka jingaijingsumar ka ba biang tam na ka bynta ki longkmie wat la ka long ka ba eh namar ba ka dei ka jaka ba baroh ki longkmie na kylleng ki thain ki ju wan ban kha khyllung ha kane ka hospital”.
Ka la bynrap “Bun hi na ki paidbah ki ju sngew ba ki jaka sumar sorkar ki ju dei ki bym biang , hynrei ngin pyrshang kat ba ïoh ki lad ban lah ban pynbeit ïa ka jingïohi jong ki paidbah ba ki jingsumar ha ki hospital sorkar ki long ki bym biang bad ngin trei kat ba lah pynbeit ai kane”.
Ka Kong Ampareen ka la kdew ruh ba ka sorkar haduh mynta ka la dep ban thungkam ïa ki 180 tam ki Doctor Specialist bad ka jylla ka donkam kumba 300 tam hynrei ka sorkar ka dangwad ïa ki lad ki lynti ban lah ban pynbiang ïa kane ka jingdonkam.
